ന്യൂഡല്‍ഹി: ഏറ്റവും വലിയ ഒറ്റകക്ഷി സ്ഥാനത്ത് കോണ്‍ഗ്രസ് എത്തിയെങ്കിലും രാഷ്ട്രീയ കരുനീക്കത്തിലൂടെ ഗോവയിലും മണിപ്പൂരിലും ബി.ജെ.പി അധികാരത്തിലേക്ക്. ആവശ്യമായി പിന്തുണ ഉറപ്പിച്ച സാഹചര്യത്തില്‍ രണ്ടു സംസ്ഥാനങ്ങളിലും സര്‍ക്കാര്‍ രൂപീകരിക്കുമെന്ന് ബി.ജെ.പി അറിയിച്ചു.

ഗോവയില്‍ ബി.ജെപിക്ക് 13 സീറ്റാണുള്ളത്. 17 സീറ്റുള്ള കോണ്‍ഗ്രസാണ് വലിയ കക്ഷി. എം.ജി.പിക്കും ജി.എഫ്.പിക്കും മൂന്നുവീതം സീറ്റുണ്ട്. മൂന്നു സ്വതന്ത്രരെയും കൂടി സ്വന്തമാക്കാനായതോടെ അധികാരം ബി.ജെ.പി ഉറപ്പിക്കുകയായിരുന്നു.

മണിപ്പൂരില്‍ സര്‍ക്കാരുണ്ടാക്കാനുള്ള പിന്തുണയുണ്ടെന്ന് ബി.ജെ.പി ജനറല്‍ സെക്രട്ടറി രാംമാധവ് അറിയിച്ചു. 31 പേരുടെ പിന്തുണ ബി.ജെ.പിക്കുണ്ടെന്നാണ് അവകാശവാദം ഉന്നയിച്ചിരിക്കുന്നത്.

മണിപ്പൂരില്‍ ബി.ജെ.പിക്ക് 21 സീറ്റും കോണ്‍ഗ്രസിന് 28 സീറ്റുമാണുള്ളത്. പത്തു പേരുടെ പിന്തുണ ഉറപ്പാക്കിയെന്നാണ് ബി.ജെ.പി അറിയിച്ചത്. നാല് അംഗങ്ങളുള്ള എന്‍.പി.പി കേന്ദ്രത്തില്‍ ബി.ജെ.പിയുടെ സഖ്യകക്ഷിയാണ്. ബി.ജെ.പിക്ക് പിന്തുണ നല്‍കുമെന്നും ഇവര്‍ വ്യക്തമാക്കിയിരുന്നു. പിന്നാലെ നാലു സീറ്റുകളുള്ള എന്‍.പി.എഫും ബി.ജെ.പിക്ക് പിന്തുണയുമായെത്തിയിരുന്നു.