കാര്‍ഷിക നന്മയുടെ  മഹിമയൊരുക്കി ഞാറ്റുവേല ചന്ത
വടക്കാഞ്ചേരി:  കാര്‍ഷിക  മലയോരഗ്രാമമായ തെക്കുംകരയില്‍ മഹത്തായ കാര്‍ഷിക സംസ്‌ക്കാരത്തെ താലോലിച്ച് ഞാറ്റുവേല ചന്ത  പഞ്ചാ യത്ത് ഭരണ സമിതി , മണ്ണുത്തി കാര്‍ഷിക  സര്‍വ്വകലാശാലയുടെ സഹകരണത്തോടെ നടപ്പിലാക്കുന്ന ചന്ത  കാര്‍ഷിക നന്മയി ലേക്കുള്ള പുതിയ പന്ഥാവ് തീര്‍ക്കുന്നു.   പുന്നംപറമ്പ് ഗവണ്‍മെന്റ് ഹൈസ്‌കൂളിന്  സമീപം  മച്ചാട്  താണിക്കുടം  റോഡിനോട് ചേര്‍ന്ന് പ്രത്യേകം  തയാറാക്കിയ സ്ഥലത്താണ് ചന്ത ക്രമീകരിച്ചിട്ടുള്ളത്  വിവിധയിനം തെങ്ങിന്‍ തൈകള്‍,  മരങ്ങള്‍ , നാടന്‍ ഫലവൃക്ഷതൈകള്‍  മഴ കാല പച്ചക്കറി തൈകള്‍ , വിത്തുകള്‍ എന്നിവയുടെ വിപുലമായ ശേഖരം തന്നെ ചന്തയുടെ ഭാഗമാണ്  വിവിധയിനം ഔഷധ ചെടികളും, പൂച്ചെടികളും,  ചന്തയില്‍ നയന മനോഹര കാഴ്ചയൊരുക്കുന്നു.  ഇതോടൊപ്പം  കുടുംബശ്രീ യൂണിറ്റുകളുടേയും  വിവിധ ഏജന്‍സികളുടേയും സ്റ്റാളുകളും  ചന്തയോടനുബന്ധിച്ച്  ക്രമീകരിച്ചിട്ടുണ്ട് ആയുര്‍വേദ ഉല്‍പന്നങ്ങള്‍ വിറ്റഴിക്കുന്ന സ്റ്റാളും  ഒരുക്കിയിട്ടുണ്ടെന്ന് പഞ്ചായത്ത് പ്രസിഡന്റ്  എം.കെ ശ്രീജ  വൈസ് പ്രസിഡന്റ് സി.വി  സുനില്‍ കുമാര്‍ എന്നിവര്‍  അറിയിച്ചു.   നാടിന്റെ കൂട്ടായ്മയൊരുക്കി ചന്ത മുന്നേറുമ്പോള്‍ അത് പുതിയൊരു കാര്‍ഷിക മുന്നേറ്റമാവുകയാണ്.
ചന്തയുടെ രണ്ടാം ദിനമായ ഇന്നലെ   വിവിധ വിഷയങ്ങളില്‍ സെമിനാറുകള്‍ നടന്നു.   ജൈവ കീടനാശിനി നിര്‍മ്മാണത്തെ കുറിച്ച്  കൃഷി ഓഫീസര്‍ ശ്രീലേഖയും , മാലിന്യ നിര്‍മ്മാര്‍ജ്ജനത്തെ കുറിച്ച് ഇ.ടി.സി പ്രൊഫസര്‍ എം. രേണുകുമാറും  ക്ലാസെടുത്തു.  
വടക്കാഞ്ചേരി ബ്ലോക്ക് പഞ്ചായത്ത് പ്രസിഡന്റ്   എസ് ബസന്ത്‌ലാല്‍ ഉദ്ഘാടനം ചെയ്തു.  സ്ഥിരം സമിതി അധ്യക്ഷന്‍ ഇ.എന്‍ ശശി അധ്യക്ഷനായി. പഞ്ചായത്ത് പ്രസിഡന്റ്  എം.കെ ശ്രീജ,  വൈസ് പ്രസിഡന്റ്  സി.വി സുനില്‍ കുമാര്‍ ബ്ലോക്ക്  പഞ്ചായത്ത് സ്ഥിരം സമിതി അധ്യക്ഷന്‍  എ.കെ സുരേന്ദ്രന്‍ തുടങ്ങിയവര്‍ പ്രസംഗിച്ചു.   വാര്‍ഡ് മെമ്പര്‍ മാരായ പി.ജെ രാജു സ്വാഗതവും, കെ.എം രാജന്‍ നന്ദിയും പറഞ്ഞു.