വാടാനപ്പള്ളി: കഞ്ചാവ് വില്‍പ്പനക്കിടെ യുവാവിനെ എക്‌സ്‌ഐസ് സംഘം പിടികൂടി ഒപ്പമുണ്ടായിരുന്നയാള്‍ ഓടിരക്ഷപ്പെട്ടു. ചാവക്കാട് കടപ്പുറം തൊട്ടാപ്പില്‍ താമസിക്കുന്ന പള്ളത്ത്‌വീട്ടില്‍ അലി അഹമ്മദ് (37)നെയാണ്  എക്‌സൈസ് അധികൃതര്‍ പിടികൂടിയത്. രഹസ്യ വിവരത്തെ തുടര്‍ന്ന് എക്‌സൈസ് ഷാഡോ സംഘം നടത്തിയ അന്വേഷണത്തില്‍   കഴിഞ്ഞാ ദിവസം രാത്രി പത്തുമണിയോടെ മൂന്നാം കല്ല് പട്ടിണഞ്ഞാറു ഭാഗത്ത് കഞ്ചാവ് വില്‍ക്കാനുള്ള യാത്രക്കിടയില്‍ സംഘം പിടികൂടിയത്. അലി അഹമ്മദിനു ഒപ്പമുണ്ടായിരുന്ന മറ്റൊരു യുവാവ് കഞ്ചാവ് പൊതിയുമായി ഓടി രക്ഷപ്പെട്ടു സംഘം പിന്തുടര്‍ന്നെങ്കിലും പിടികൂടാനായില്ല.
അലി അഹമ്മദില്‍നിന്നും അന്‍പതു ഗ്രാം കഞ്ചാവും, കഞ്ചാവ് പാക്കിങ്ങിനു ഉപയോഗിക്കുന്ന ചെറിയ പോളിത്തീന്‍ കവറുകളും, ഇവര്‍ ഉപയോഗിച്ചിരുന്ന മഹീന്ദ്ര സ്‌കൂട്ടിയും എക്‌സൈസ് പിടിച്ചെടുത്തു.സ്‌കൂള്‍, കോളജ് വിദ്യാര്‍ഥികള്‍ക്കാണ് ഇയാള്‍ വില്‍പ്പന നടത്തുന്നതെന്നും ആവശ്യക്കാര്‍ മൊബൈല്‍ ഫോണ്‍ വഴി ബന്ധപ്പെട്ടാല്‍ അതാതു സ്ഥലങ്ങളില്‍ എത്തിച്ചു കൊടുക്കുകയാണ് ചെയ്യുന്നതെന്നും എക്‌സൈസ് സംഘം പറഞ്ഞു.
എക്‌സൈസ് സര്‍ക്കിള്‍ ഇന്‍സ്‌പെക്ടര്‍ കെ.പ്രദീപ് കുമാര്‍, ഇന്‍സ് പെക്ടര്‍മാരായ ജിജിപോള്‍, കെ.പങ്കജാക്ഷന്‍, സിവില്‍ എക്‌സൈസ് ഇന്‍സ്‌പെക്ടര്‍ മാരായ കെ.വി രാജേഷ്, ആര്‍.എഫ് രാജേഷ്, ജോജോ, സന്തോഷ് എന്നിവരടങ്ങുന്ന സംഘമാണ് യുവാവിനെ പിടികൂടിയത്. ഓടി രക്ഷപ്പെട്ട പ്രതിക്കായി അന്വേഷണം ആരംഭിച്ചു.