കൊച്ചി: പ്രായപൂര്‍ത്തിയാകാത്ത പെണ്‍കുട്ടിയെ അശ്ലീല ചിത്രം കാണിക്കുകയും അസഭ്യം വിളിക്കുകയും ചെയ്തയാളെ കോടതി റിമാന്‍ഡ് ചെയ്തു. ചിറ്റൂര്‍ ഇട്ടിപ്പറ്റ സെബാസ്റ്റ്യനാണ് റിമാന്‍ഡിലായത്.
കുട്ടിയുടെ വീടിനടുത്തുള്ള വിദേശമദ്യ വില്‍പനശാലയില്‍ മദ്യം വാങ്ങാനെത്തിയതിനിടേ ഇയാള്‍ വീടിനുമുന്നില്‍ നില്‍ക്കുകയായിരുന്ന പെണ്‍കുട്ടിയോട് ഒരാളുടെ വീട്ടിലേക്കുള്ള വഴി തിരക്കി. കുട്ടി അറിയില്ലെന്നു പറഞ്ഞപ്പോള്‍ മൊബൈല്‍ ഫോണ്‍ എടുത്ത് അശ്ലീലചിത്രം കാണിക്കുകയും അസഭ്യം വിളിക്കുകയുമായിരുന്നെന്ന് നോര്‍ത്ത് പൊലിസ് പറഞ്ഞു.
പരാതിയെ തുടര്‍ന്ന് ശനിയാഴ്ച രാത്രിതന്നെ നോര്‍ത്ത് എസ്.ഐ വിപിന്‍ദാസിന്റെ നേതൃത്വത്തിലുള്ള സംഘം പ്രതിയെ പിടികൂടി കോടതിയില്‍ ഹാജരാക്കുകയായിരുന്നു.