കോഴിക്കോട്: തളര്‍ന്ന ശരീരവും തളരാത്ത മനസുമായി കാര്‍ ഓടിച്ച് ഡല്‍ഹിയിലേക്ക് യാത്ര തിരിച്ച പ്രജിത്ത് ജയപാല്‍ രാജ്യതലസ്ഥാനത്ത് എത്തിച്ചേര്‍ന്നു. യാത്രയിലുടനീളം അംഗപരിമിതരുമായും വിവിധ കോര്‍പറേറ്റ് കമ്പനികളുമായും വിവിധ സംഘടനകളുമായും നേരില്‍ കാണുകയും ചര്‍ച്ചകള്‍ നടത്തുകയുമുണ്ടായി. 4,237 കിലോമീറ്ററുകള്‍ താണ്ടിയാണ് തലസ്ഥാനത്തെത്തിയത്.
ഡല്‍ഹിയിലെത്തിയ ശേഷം വികലാംഗ ക്ഷേമ, സാമൂഹ്യ ക്ഷേമകാര്യ സഹമന്ത്രി വിജയ് സാംപ്‌ളെ, കേന്ദ്ര മന്ത്രി താവര്‍ചന്ദ് ഗഹ്‌ലോട്ട് എന്നിവരെ സന്ദര്‍ശിച്ചു.
ഓള്‍ ഇന്ത്യ മലയാളി അസോസിയേഷന്റെയും മറ്റു മലയാളി സംഘടനകളുടെയും സംയുക്താഭിമുഖ്യത്തില്‍ ഡല്‍ഹി കേരള ഹൗസില്‍ ഏര്‍പ്പെടുത്തിയ സ്വീകരണ യോഗത്തില്‍ സുപ്രിംകോടതി ജഡ്ജി ജസ്റ്റിസ് കുര്യന്‍ ജോസഫ് ഉദ്ഘാടനം നിര്‍വഹിച്ചു.
ഡി.സി.സി ലാന്റ് കമ്മിഷണര്‍ സുബു റഹ്മാന്‍ ഐ.എ.എസ് പങ്കെടുത്തു. മെയ് രണ്ടിന് രാവിലെ 10ന് പ്രധാനമന്ത്രി നരേന്ദ്രമോദിയുമായി കൂടിക്കാഴ്ച നടത്തിയിരുന്നു.
ഡല്‍ഹിയില്‍നിന്ന് തിരിച്ച് കോഴിക്കോട്ടേക്കുള്ള യാത്ര മെയ് നാലിന് ആരംഭിച്ചു. ലക്‌നൗ, ഗ്വാളിയോര്‍, നാഗ്പൂര്‍, ഹൈദരാബാദ്, ചെന്നൈ, രാമേശ്വരം, കന്യാകുമാരി, തിരുവനന്തപുരം, കൊച്ചി, കോയമ്പത്തൂര്‍ വഴി ജൂണ്‍ രണ്ടിന് കോഴിക്കോട്ട് എത്തിച്ചേരും.