ചെന്നൈ: തമിഴ് രാഷ്ട്രീയം ഉറ്റുനോക്കിയ സൂപ്പര്‍താരം വിജയ് യുടെ ആദ്യ രാഷ്ട്രീയ സമ്മേളനം വില്ലുപുരത്ത് ആരംഭിച്ചു. വിജയ് രൂപീകരിച്ച രാഷ്ട്രീയ പാര്‍ട്ടിയായ തമിഴക വെട്രി കഴകം (ടിവികെ) ത്തിന്റെ പ്രഥമ സംസ്ഥാന സമ്മേളനത്തില്‍ പതിനായിരക്കണക്കിന് ജനങ്ങളാണ് എത്തിച്ചേര്‍ന്നത്. വൈകീട്ട് നാലോ ജനസമുദ്രത്തിനിടയിലേക്ക് വിജയ് എത്തി. വേദിയില്‍ പ്രത്യേകം സജ്ജമാക്കിയ റാംപിലൂടെ നടന്നുനീങ്ങിയ താരം പ്രവര്‍ത്തകരെ അഭിവാദ്യം ചെയ്തു. 

പാര്‍ട്ടിയുടെ ഔദ്യോഗിക ഗാനത്തോടെ ആരംഭിച്ച പരിപാടിയില്‍ 100 അടി ഉയരുമുള്ള കൊടിമരത്തില്‍ പാര്‍ട്ടി പതാകയും ഉയര്‍ത്തി. റിമോട്ട് കണ്‍ട്രോളിലൂടെയാണ് വിജയ് പതാക ഉയര്‍ത്തിയത്. ആരാധകരുടെയും പ്രവര്‍ത്തകരുടെയും വന്‍ തിരക്കാണ് സമ്മേളന സ്ഥലത്തുള്ളത്. തിരക്കിനിടെ നിര്‍ജലീകരണത്തെതുടര്‍ന്ന് നൂറിലധികം പേര്‍ കുഴഞ്ഞുവീണു. 35ലധികം ഡോക്ടര്‍മാരെ സമ്മേളന സ്ഥലത്ത് നിയോഗിച്ചിട്ടുണ്ട്. 

വിഴുപ്പുറം ജില്ലയിലെ വിക്രവാണ്ടിയില്‍ 85 ഏക്കറില്‍ തയാറാക്കിയ പ്രത്യേക വേദിയിലാണ് സമ്മേളനം.പാര്‍ട്ടിയുടെ പ്രത്യയശാസ്ത്രവും നയങ്ങളും വിജയ് അവതരിപ്പിക്കും.  19 പ്രമേയങ്ങളായിരിക്കും സമ്മേളനത്തില്‍ അവതരിപ്പിക്കുക. ഫെബ്രുവരിയില്‍ രാഷ്ട്രീയ പ്രവേശനം പ്രഖ്യാപിച്ച വിജയ് ഓഗസ്റ്റിലാണ് പാര്‍ട്ടി പാതകയും ഗാനവും അവതരിപ്പിച്ചത്. മഞ്ഞയും ചുവപ്പും നിറങ്ങളില്‍ നടുവില്‍ ആനകളും, വാകപ്പൂവും ആലേഖനം ചെയ്തതാണ് പതാക. ടിവികെയെ രജിസ്റ്റേര്‍ഡ് രാഷ്ട്രീയ പാര്‍ട്ടി ആയി തെരഞ്ഞെടുപ്പ്  കമ്മീഷനും അംഗീകരിച്ചിട്ടുണ്ട്.  

TVKs first meeting at Janasagaram Thirt Vijay to take a political stand