മുക്കം: പന്നിക്കോട് യുവാവിനെ വെട്ടിക്കൊലപ്പെടുത്താന്‍ ശ്രമിച്ച കേസിലെ പ്രതികളെ മുക്കം പൊലിസ് കസ്റ്റഡിയില്‍ വാങ്ങി. കൂടുതല്‍ ചോദ്യം ചെയ്യലിനായാണ് പൊലിസ് കസ്റ്റഡിയില്‍ വാങ്ങിയത്.
പ്രതികളായ കാരശേരി കറുത്ത പറമ്പ് സ്വദേശി നിജാസ്, മുക്കം ആലിന്‍തറ അമ്പലകണ്ടി സ്വദേശി ആസിഫ് എന്ന പോത്തച്ചന്‍, ഫറോക്ക് സ്വദേശി സുബൈര്‍ എന്നിവരെയാണ് കസ്റ്റഡിയില്‍ വാങ്ങിയത്. കഴിഞ്ഞ മാസം ഒന്‍പതിന് രാത്രി 8.30 ഓടെയാണ് നാട്ടുകാര്‍ നോക്കിനില്‍ക്കെ കാറിലെത്തിയ നാലംഗ സംഘം കൊടിയത്തൂര്‍ എരഞ്ഞിമാവില്‍ താമസിക്കുന്ന സുല്‍ഫിയെ വെട്ടിക്കൊലപ്പെടുത്താന്‍ ശ്രമിച്ചത്.
പന്നിക്കോട് കടയില്‍ നിന്ന് സാധനങ്ങള്‍ വാങ്ങി വീട്ടിലേക്ക് പോവാന്‍ ശ്രമിക്കുന്നതിനിടെ രണ്ട് പേര്‍ ചേര്‍ന്ന് ബലമായി പിടിച്ചു വച്ചതിന് ശേഷം ഒരാള്‍ വെട്ടുകയായിരുന്നു.
സംഭവത്തിന് ശേഷം ഒളിവില്‍ പോയ പ്രതികള്‍ കഴിഞ്ഞ ദിവസമാണ് കോടതിയില്‍ കീഴടങ്ങിയത്. ഇതോടെയാണ് കൂടുതല്‍ ചോദ്യം ചെയ്യുന്നതിനായി പോലിസ് കസ്റ്റഡിയില്‍ വാങ്ങിയത്.
കോടതിയുടെ അനുമതി ലഭിച്ചാല്‍ പ്രതികളെ സംഭവസ്ഥലത്തെത്തിച്ച് തെളിവെടുപ്പ് നടത്തുമെന്ന് പൊലിസ് അറിയിച്ചു.