റിയാദ്: രാജ്യത്തെ ജീവിത നിലവാരം ഉയര്‍ത്തുന്നതിന് വിപുലമായ പദ്ധതി പ്രഖ്യാപിച്ചു. സഊദി കിരീടാവകാശിയും സാമ്പത്തിക വികസന സമിതി അധ്യക്ഷനുമായ സമിതിയാണ് 'ക്വാളിറ്റി ഓഫ് ലൈഫ് 2020 ' എന്ന പദ്ധതി പ്രഖ്യാപിച്ചത്. വ്യക്തികളുടെയും കുടുംബത്തിന്റെയും ജീവിതനിലവാരം മെച്ചപ്പെടുത്തുന്നതിനാവശ്യമായ സാഹചര്യം ഒരുക്കുകയാണ് പദ്ധതിയുടെ ലക്ഷ്യം. ഇതിനായി സാംസ്‌കാരിക, വിനോദ, സ്‌പോര്‍ട്‌സ് മേഖലകളില്‍ പങ്കാളിത്തം വര്‍ധിപ്പിക്കുകയും തൊഴിലവസരങ്ങള്‍ കൂടുതലായി സൃഷ്ടിക്കുകയും അതിനായി വിദേശനിക്ഷേപങ്ങള്‍ വര്‍ധിപ്പിക്കുകയുമാണ് ലക്ഷ്യമിടുന്നത്. സാമ്പത്തിക വൈവിധ്യ വല്‍ക്കരണങ്ങള്‍ക്ക് പുറമെ ലോകത്തെ ഏറ്റവും മികച്ച നഗരങ്ങളുടെ പട്ടികയിലേക്ക് സഊദി നഗരങ്ങളെ ഉയര്‍ത്താന്‍ പദ്ധതി ലക്ഷ്യമിടുന്നുണ്ട്. ഇതോടൊപ്പം മൂന്നര ലക്ഷം തൊഴില്‍ സാധ്യതകളും ലക്ഷ്യമിടുന്നുണ്ട്.

നിലവില്‍ രാജ്യത്ത് പ്രഖ്യാപിച്ച ഖിദിയ്യ പദ്ധതി, ചെങ്കടല്‍ പദ്ധതി, ദര്‍ഇയ്യ പദ്ധതി, ഹിസ്‌റ്റോറിക് ജിദ്ദ പദ്ധതി, അല്‍ ഉല റോയല്‍ കമ്മീഷന്‍ പദ്ധതികള്‍ എന്നിവ ഉള്‍ക്കൊണ്ടുള്ള വിപുലമായ പദ്ധതിയാണ് പ്രഖ്യാപിച്ചത്. 2020 വരെയുള്ള കാലത്ത് 220 പദ്ധതികളാണ് ജീവിത നിലവാര പ്രോഗ്രാമിന്റെ ഭാഗമായി നടപ്പാക്കുക. 7450 കോടി റിയാലിന്റെ നേരിട്ടുള്ള നിക്ഷേപങ്ങളും 5090 കോടി റിയാലിന്റെ സര്‍ക്കാര്‍ മൂലധന നിക്ഷേപവുമായിരിക്കും ഉണ്ടാവുക.

ഇതേകാലയളവില്‍ സ്വകാര്യ മേഖലക്ക് 2370 കോടി റിയാലിന്റെ നിക്ഷേപാവസരങ്ങളും ലഭിക്കും. ഇവ കൂടാതെ വന്‍കിട പദ്ധതികളില്‍ 8600 കോടിയിലേറെ റിയാലിന്റെ മൂലധന നിക്ഷേപങ്ങളും പ്രതീക്ഷിക്കുന്നുണ്ട്. 2030 ഓടെ ലോകത്തെ ഏറ്റവും മികച്ച ജീവിത സാഹചര്യമുള്ള നൂറ് നഗരങ്ങളുടെ പട്ടികയില്‍ സഊദിയില്‍ നിന്നും ചുരുങ്ങിയത് മൂന്നു നഗരങ്ങളെങ്കിലും ഉള്‍കൊള്ളിക്കലാണ് ലക്ഷ്യം. 3,46,000 തൊഴിലവസരങ്ങള്‍ ലഭ്യമാക്കുന്നതിന് പെട്രോളിതര മേഖലകളില്‍ നിന്നും 190 കോടി റിയാല്‍ പൊതുവരുമാനം നേടുന്നതിനും ക്വാളിറ്റി ഓഫ് ലൈഫ് പദ്ധതി ലക്ഷ്യമിടുന്നുണ്ട്.