കൊപ്പം: പട്ടിണിയും പരിവെട്ടവുമായി കഴിഞ്ഞിരുന്ന കാലത്ത് രക്ഷിതാക്കളുടെ കൈപിടിച്ച് കയറിവന്ന ആറും ഏഴും പത്തും വയസുകാര്‍ ഇരുപതില്‍ പരം വര്‍ഷങ്ങള്‍ക്ക് ശേഷം ഒരുമിച്ചുകൂടിയപ്പോള്‍ പലരും സന്തോഷത്താല്‍ വിങ്ങിപ്പൊട്ടി.
കൊപ്പം ദാറുല്‍ അഥ്ഫാല്‍ അനാഥ മന്ദിരത്തില്‍ 1990 മുതല്‍ വിവിധ വര്‍ഷങ്ങളില്‍ പഠനം നടത്തിയവരുടെ സംഗമമാണ് നടന്നത്. പിരിഞ്ഞ് പോയതിന്ന് ശേഷം ഒരിക്കല്‍ പോലും പരസ്പരം കാണാത്തവരും കൂട്ടത്തിലുണ്ടായിരുന്നു. ഓട്ടോ ഡ്രൈവര്‍മാര്‍, പത്രപ്രവര്‍ത്തകര്‍, ഐ.ടി.വിദഗ്ധര്‍ തുടങ്ങി സ്വദേശത്തും വിദേശത്തും വിവിധ ജോലികളില്‍ പ്രവേശിച്ചവര്‍ സംഗമത്തിനെത്തി. ദാറുല്‍ അഥ്ഫാല്‍ സെക്രട്ടറി ഇ. മുസ്തഫ മാസ്റ്റര്‍, അബൂബക്കര്‍ ഫൈസി, സിദ്ധീഖ് മൗലവി, മുന്‍ അധ്യാപകരായ ഷാഹുല്‍ ഹമീദ് മൗലവി, ഹംസ മുസ്‌ലിയാര്‍, ഇബ്രാഹീം മാസ്റ്റര്‍ പങ്കെടുത്തു.