വടക്കാഞ്ചേരി: നഗരസഭയിലെ മിണാലൂരില്‍ റെയില്‍വേ അടിപ്പാത യാഥാര്‍ഥ്യമാകുന്നു. സ്ഥിരമായി അടച്ചിടാന്‍ തീരുമാനമെടുത്ത മിണാലൂര്‍ റെയില്‍വേ ഗെയ്റ്റ് ഒഴിവാക്കി വാഹനയാത്ര സുഗമമാക്കുന്നതിനു വേണ്ടിയാണു മിണാലൂര്‍ അടിപ്പാത നിര്‍മിച്ചത്.
ഒട്ടേറെ ജനകീയ പോരാട്ടങ്ങള്‍ക്കൊടുവിലാണു മുന്‍ സര്‍ക്കാരിന്റെ കാലത്തു അടിപ്പാതയുടെ നിര്‍മ്മാണ പ്രവര്‍ത്തനങ്ങള്‍ ആരംഭിച്ചത്. നാലര കോടി രൂപ ചിലവഴിച്ചാണു അടിപ്പാത യാഥാര്‍ത്ഥ്യമാക്കിയത്. സംസ്ഥാന പാതയില്‍ മിണാലൂര്‍ ബൈപ്പാസ് യാഥാര്‍ത്ഥ്യമാകുന്നതു വരെ വാഹനങ്ങളും ബസുകളുമൊക്കെ കടന്നു പോയിരുന്നതു ഈ റോഡിലൂടെയായിരുന്നു. ബൈപ്പാസ് തുറന്നതോടെ മിണാലൂര്‍ റെയില്‍വേ ഗെയ്റ്റും റെയില്‍വേ അടച്ചു.
ഇതോടെ മിണാലൂര്‍ നിവാസികള്‍ക്കു തൊട്ടടുത്ത അത്താണിയിലെത്താന്‍ പോലും കിലോമീറ്ററുകള്‍ ചുറ്റി വളയേണ്ട അവസ്ഥ ഉടലെടുത്തു. ജനങ്ങളുടെ സഞ്ചാര സ്വാതന്ത്ര്യം തടസപ്പെട്ടതോടെ അതു വലിയ പ്രക്ഷോഭമായി വളര്‍ന്നു. ഇതിനൊടുവിലാണു അടിപ്പാത നിര്‍മ്മാണത്തിനു തുടക്കമായത്. കുറ്റിയങ്കാവ് ക്ഷേത്രത്തിനു മുന്നിലാണു അടിപ്പാത . ഇനി സൗന്ദര്യവല്‍ക്കരണ പ്രവര്‍ത്തികള്‍ മാത്രമാണു അവശേഷിയ്ക്കുന്നത് . അടിപ്പാതയ്ക്കു സമീപമുള്ള സ്വകാര്യ വ്യക്തികളുടെ ഭൂമി അളന്നു തിട്ടപ്പെടുത്താന്‍ നഗരസഭ തീരുമാനമെടുത്തിട്ടുണ്ട്.
കയ്യേറ്റങ്ങള്‍ പിടിച്ചെടുത്തു ഈ സ്ഥലങ്ങള്‍ വിനോദ സഞ്ചാരികളെ ആകര്‍ഷിയ്ക്കുന്ന വിധത്തില്‍ മനോഹരമാക്കുന്നതിനാണു തീരുമാനം. അടിപ്പാതയ്ക്കു ചുറ്റും വൈദ്യൂത ദീപാലങ്കാരങ്ങള്‍ ഒരുക്കുന്നതിനും തീരുമാനമെടുത്തിട്ടുണ്ട്. അടുത്ത ആഴ്ച്ചയോടെ പാത തുറന്നു കൊടുക്കുമ്പോള്‍ നേരത്തെ ഇതു വഴി സര്‍വ്വീസ് നടത്തിയിരുന്ന പെര്‍മിറ്റുള്ള ബസുകള്‍ വീണ്ടും ഈ റൂട്ടിലൂടെ ഓടിയ്ക്കുന്നതിനുള്ള ശ്രമങ്ങളും ആരംഭിച്ചിട്ടുണ്ട്.