തലശ്ശേരി: മാഹിയില്‍ തിങ്കളാഴ്ച നടന്ന ഇരട്ടക്കൊലപാതകത്തെ തുടര്‍ന്ന് പുതുച്ചേരി-കേരള പൊലിസ് മേധാവികള്‍ തമ്മില്‍ സംയുക്ത ചര്‍ച്ച നടത്തി. ഇന്നലെ ഉച്ചക്ക് തലശ്ശേരി റസ്റ്റ് ഹൗസിലായിരുന്നു കൂടിക്കാഴ്ച. കേരള ഡി.ജി.പി ലോക്‌നാഥ് ബെഹ്‌റയും പുതുച്ചേരി ഡി.ജി.പി സുനില്‍കുമാര്‍ ഗൗതവുമാണ് രണ്ടു മണിക്കൂര്‍ നേരം കൂടിക്കാഴ്ച നടത്തിയത്.
കേരള ഉത്തര മേഖലാ ഡി.ഐ.ജി അനില്‍കാന്ത്, കണ്ണൂര്‍ ജില്ലാ പൊലിസ് മേധാവി ശിവവിക്രം, തലശ്ശേരി എ.എസ്.പി ചൈത്ര തേരേസാ ജോണ്‍, ഡിവൈ.എസ്.പി സുനില്‍ എന്നിവരും ചര്‍ച്ചയില്‍ പങ്കെടുത്തു. അതിനിടെ രണ്ടുകൊലപാതക കേസുകളിലും സത്യസന്ധമായി അന്വേഷണം നടക്കണമെന്നാവശ്യപ്പെട്ട് പുതുച്ചേരി സംസ്ഥാന ബി.ജെ.പി നേതാക്കള്‍ ഗവര്‍ണര്‍ കിരണ്‍ ബേദിയെ സമീപിച്ചിട്ടുണ്ട്.