പട്ടാമ്പി: ജില്ലയിലെ വിവിധ പ്രദേശങ്ങളില്‍ ദ്രുതകര്‍മസേന നിരീക്ഷണം നടത്തി. വൈകാരിക വിഷയങ്ങളുമായി ബന്ധപ്പെട്ട് അക്രമങ്ങള്‍ പൊട്ടി പുറപ്പെട്ടാല്‍ അത് നേരിടാനാണ് ദ്രുതകര്‍മസേനയുടെ സേവനം ഉപയോഗിക്കുന്നത്.
ഇന്റലിജന്‍സ് വിഭാഗം നല്‍കുന്ന വിവരത്തെ തുടര്‍ന്നാണ് പൊലിസും റാപ്പിഡ് ആക്ഷന്‍ ഫോഴ്‌സ് കമാന്‍ഡോസും ജില്ലയിലെ പ്രശ്‌ന ബാധിത പ്രദേശങ്ങളില്‍ നിരീക്ഷണം നടത്തുന്നത്. ഇതിന്റെ ഭാഗമായി ഓങ്ങല്ലൂര്‍, കാരക്കാട് പ്രദേശങ്ങളില്‍ അമ്പതംഗ സംഘം റൂട്ട് മാര്‍ച്ച് നടത്തി.
കോയമ്പത്തൂരില്‍ നിന്നാണ് സേന എത്തിയത്. പി.കെ സുമയുടെ നേതൃത്വത്തിലുള്ള സേനയാണ് കാരക്കാട്ടു നിന്ന് ഓങ്ങല്ലൂരിലേക്ക് മൂന്ന് കിലോമീറ്ററോളം ദൂരം മാര്‍ച്ച് നടത്തിയത്.
വൈകാരികതയോ അതിവൈകാരികതയോ മൂലം ഉത്ഭവിക്കുന്ന സംഘര്‍ഷങ്ങളും രാഷ്ട്രീയപരമായോ മതപരമായോ മറ്റു ഏതെങ്കിലും തരത്തിലുള്ള ലഹളകള്‍ ഉണ്ടായാല്‍ പ്രതിരോധിക്കാനുള്ള മുന്‍കരുതലുകള്‍ എടുക്കുന്നത്തിന്റെ ഭാഗമായാണ് ഇത്തരത്തിലുള്ള മാര്‍ച്ച് നടത്തുന്നതെന്ന് പി.കെ സുമ മാധ്യമങ്ങളോട് പറഞ്ഞു. കഴിഞ്ഞ വര്‍ഷവും ദ്രുതകര്‍മസേന ഓങ്ങല്ലൂരില്‍ വന്നിരുന്നു. അന്ന് ജനകീയ ശുചീകരണ യജ്ഞത്തിലാണ് സേനാംഗങ്ങള്‍ പങ്കെടുത്തത്.