മഞ്ചേരി: കുനിയില്‍ ഇരട്ടക്കൊലക്കേസ് പതിനേഴാം  പ്രതി വിദേശത്തു പിടിയില്‍. കീഴുപറമ്പ് ഓത്തുപള്ളി പൂറായ കോട്ട സബൂറാ(28)ണ്  ഇന്റര്‍പോളിന്റെ സഹായത്തോടെ സൗദി പൊലിസ് അറസ്റ്റ് ചെയ്തത്. കേസ് അന്വേഷണം നടക്കുന്നതിനിടെ മുങ്ങിയ സബൂര്‍ സൗദിയിലേക്ക് കടക്കുകയായിരുന്നു. സൗദിയിലുള്ള സബൂറിനെതിരേ നാലു വര്‍ഷംമുമ്പ് ഇന്റര്‍പോള്‍ അറസ്റ്റ് വാറന്റ് പുറപ്പെടുവിച്ചിരുന്നു. കൊല്ലപ്പെട്ട സഹോദരങ്ങളുടെ ബന്ധുക്കള്‍ നല്‍കിയ പരാതിയെത്തുടര്‍ന്നാണു പ്രതിക്കെതിരേ ഇന്റര്‍പോള്‍ അറസ്റ്റ് വാറണ്ട് പുറപ്പെടുവിച്ചത്. മഞ്ചേരി ജില്ലാ സെഷന്‍ കോടതി ജഡ്ജ് മുമ്പാകെ വിസ്താരം നടക്കാനിരിക്കെയാണു പ്രതി പിടിയിലായത്.  2012 ജൂണ്‍ 10നാണു കേസിനാസ്പദമായ സംഭവം. ആതീഖ് റഹ്മാന്‍ വധക്കേസില്‍ പ്രതിചേര്‍ക്കപ്പെട്ട കൊളക്കാടന്‍ അബൂബക്കര്‍ എന്ന കുഞ്ഞാപ്പു(48), സഹോദരന്‍ അബ്ദുല്‍ കലാം ആസാദ്(37) എന്നിവരെ മുഖം മൂടി ധരിച്ചെത്തിയ സംഘം വെട്ടിക്കൊലപ്പെടുത്തിയെന്നാണു കേസ്. പത്ത് ദൃക്‌സാക്ഷികള്‍ ഉള്‍പ്പെടെ 360 സാക്ഷികളുടെ വിസ്താരം ഉടന്‍ ആരംഭിക്കും.