കണ്ണൂര്‍: ഹയര്‍സെക്കന്‍ഡറി വിഭാഗത്തില്‍ സംസ്ഥാനതലത്തില്‍ ഏറ്റവും കൂടുതല്‍ വിജയശതമാനവുമായി ഇത്തവണയും കണ്ണൂരിലെ കുട്ടികള്‍ മിടുക്ക് തെളിയിച്ചു. 86.75 ആണ് ഇത്തവണ ജില്ലയുടെ വിജയശതമാനം. ജില്ലയില്‍ 25 കുട്ടികള്‍ 1200ല്‍ 1200 മാര്‍ക്കും നേടുകയും ചെയ്തതോടെ കണ്ണൂരിന് ഇരട്ടിമധുരമായി മാറി. 1408 കുട്ടികള്‍ മുഴുവന്‍ വിഷയത്തിലും എ പ്ലസ് ഗ്രേഡും നേടിയിട്ടുണ്ട്. ഏഴ് സ്‌കൂളുകള്‍ക്ക് പരീക്ഷയെഴുതിയ മുഴുവന്‍ കുട്ടികളെയും വിജയിപ്പിക്കാനായി. വി.എച്ച്.എസ്.ഇ വിഭാഗത്തില്‍ കണ്ണൂരില്‍ 1481 വിദ്യാര്‍ഥികള്‍ പരീക്ഷയെഴുതി. ഇതില്‍ 1167 പേര്‍ ഉപരിപഠനത്തിന് യോഗ്യത നേടി. 78.80 ശതമാനമാണ് വി.എച്ച്.എസ്.ഇ വിഭാഗത്തില്‍ ജില്ലയുടെ വിജയശതമാനം.
2016ലും 2017ലും ഹയര്‍ സെക്കന്‍ഡറി വിജയശതമാനത്തില്‍ കണ്ണൂര്‍ തന്നെയായിരുന്നു മുന്നില്‍. 84.86 ശതമാനം 2016ല്‍ ലഭിച്ചപ്പോള്‍ 2017ല്‍ 82.22 ശതമാനം വിദ്യാര്‍ഥികളാണ് ജില്ലയില്‍ വിജയം നേടിയത്. എന്നാല്‍ ആദ്യമായാണ് ഇത്രയും വലിയശതമാനത്തില്‍ ഹയര്‍സെക്കന്‍ഡറി വിഭാഗം വിദ്യാര്‍ഥികള്‍ ഉപരിപഠനത്തിന് യോഗ്യത നേടുന്നത്.
ജില്ലയില്‍ ഇത്തവണ 158 സ്‌കൂളുകളിലായി 29,623 വിദ്യാര്‍ഥികളാണ് പരീക്ഷയെഴുതിയത്. ഇതില്‍ 25,699 പേര്‍ ഉപരിപഠനത്തിന് അര്‍ഹത നേടി. ഓപ്പണ്‍ സ്‌കൂള്‍ വിഭാഗത്തില്‍ ജില്ലയില്‍ പരീക്ഷയെഴുതിയ 3,906 വിദ്യാര്‍ഥികളില്‍ 1,552 പേര്‍ ഉപരിപഠനത്തിന് യോഗ്യതനേടി.
ഓപ്പണ്‍ സ്‌കൂള്‍ വിഭാഗത്തില്‍ 39.73 ആണ് ജില്ലയുടെ വിജയശതമാനം. എന്നാല്‍ ഈ വിഭാഗത്തില്‍ ആരും മുഴുവന്‍ വിഷയത്തിലും എ പ്ലസ് നേടിയിട്ടില്ല. സേ പരീക്ഷ ജൂണ്‍ അഞ്ചുമുതല്‍ 12 വരെ നടക്കും. പുനര്‍മൂല്യനിര്‍ണയത്തിനും സേ പരീക്ഷയ്ക്കും 16 വരെ അപേക്ഷിക്കാം. പ്ലസ് വണ്‍ പരീക്ഷാഫലം മേയ് അവസാനത്തോടെ പ്രഖ്യാപിക്കും. പ്ലസ് ടു ക്ലാസുകള്‍ ജൂണ്‍ ഒന്നിനു തുടങ്ങും.