കണിയാമ്പറ്റ:  വിദ്യാര്‍ഥികളിലും അമ്മമാരിലും വായനാ താല്‍പര്യം വളര്‍ത്തിയെടുക്കുക എന്ന ലക്ഷ്യത്തോടെ കണിയാമ്പറ്റ ഗവ യു.പി സ്‌കൂളില്‍ ഒരു വര്‍ഷമായി നടപ്പാക്കിയ 'അമ്മ'വായന പദ്ധതിയുടെ സമാപനം കണിയാമ്പറ്റ പഞ്ചായത്തംഗം റഷീന സുബൈര്‍ നിര്‍വഹിച്ചു. സ്‌കൂള്‍ ലൈബ്രറിയില്‍ നിന്നും എടുക്കുന്ന പുസ്തകങ്ങള്‍ അമ്മയും കുട്ടിയും ചേര്‍ന്ന് വായിക്കുകയും വായനാകുറിപ്പ് തയാറാക്കുകയും ചെയ്തതിന് ശേഷം അമ്മമാര്‍ക്കു വേണ്ടി നടത്തിയ രചനാ മത്സരത്തില്‍  അംബിക ഒന്നാം സ്ഥാനവും സുഹറ രണ്ടാം സ്ഥാനവും നേടി. യോഗത്തില്‍ പി.ടി.എ പ്രസിഡന്റ് സൈനുദ്ദീന്‍ മുസ്‌ലിയാര്‍ അധ്യക്ഷനായി. എഴുത്തുകാരനായ ജയചന്ദ്രന്‍ മുഖ്യപ്രഭാഷണവും വിജയികള്‍ക്കുള്ള സമ്മാനദാനവും നിര്‍വഹിച്ചു. ഹെഡ്മാസ്റ്റര്‍ ടി.ടി ചിന്നമ്മ, അബൂബക്കര്‍, ജയശ്രീ, സയ്യിദ് ഫാസില്‍, ഖലീലുറഹിമാന്‍, അംബിക, ദീപക് പി ബിജു സംസാരിച്ചു.