ലണ്ടന്‍: ഇംഗ്ലീഷ് പ്രീമിയര്‍ ലീഗില്‍ കഴിഞ്ഞ ദിവസം നടന്ന മത്സരത്തില്‍ മാഞ്ചസ്റ്റര്‍ സിറ്റിക്ക് റെക്കോര്‍ഡ്. ബ്രൈട്ടണ്‍ ഹോവ് ആല്‍ബിയോയെ 3-1ന് തോല്‍പിച്ചാണ് ഗോളുകളുടെ എണ്ണത്തിലും പോയിന്റ് കണക്കിലും സിറ്റി റെക്കോര്‍ഡിട്ടത്. പ്രീമിയര്‍ ലീഗില്‍ ഒരു സീസണില്‍ ഏറ്റവും കൂടുതല്‍ പോയിന്റ് (97) നേടുന്ന ടീം, ഏറ്റവും കൂടുതല്‍ ജയം (31) നേടുന്ന ടീം, ഏറ്റവും കൂടുതല്‍ ഗോളുകള്‍ (105) നേടുന്ന ടീം എന്നീ റെക്കോര്‍ഡുകളാണ് സിറ്റി സ്വന്തമാക്കിയത്. 2004-05 സീസണില്‍ ചെല്‍സി കുറിച്ച 95 പോയിന്റ് മറി കടന്നാണ് സിറ്റി നേട്ടം സ്വന്തമാക്കിയത്.
പ്രീമിയര്‍ ലീഗില്‍ ഒരു ജയം കൂടി സ്വന്തമാക്കിയാല്‍ സീസണില്‍ ഏറ്റവും കൂടുതല്‍ വിജയങ്ങളെന്ന റെക്കോര്‍ഡും സിറ്റിക്ക് സ്വന്തമാക്കാം. ക്ലബ് വിടുന്ന ഐവറി കോസ്റ്റ് താരം യായ ടൂറെക്കുള്ള യാത്രയയപ്പും ക്ലബ് നല്‍കി.
മറ്റൊരു മത്സരത്തില്‍ ടോട്ടനം ന്യൂകാസില്‍ യുനൈറ്റഡിനെ ഒരു ഗോളിന് തോല്‍പിച്ചു. ഇതോടെ ടോട്ടനം ചാംപ്യന്‍സ് ലീഗിലേക്ക് യോഗ്യത നേടി. ഇതോടെ ലിവര്‍പൂളിന്റെ സാധ്യത തുലാസിലാവുകയും ചെയ്തു.  മറ്റൊരു മത്സരത്തില്‍ ആഴ്‌സനല്‍ ലൈസസ്റ്റര്‍ സിറ്റിയോട് 3-1ന് പരാജയപ്പെട്ടു.