ആലുവ: നഗരത്തില്‍ മോഷണ പരമ്പര. നഗരമധ്യത്തിലെ മൂന്ന് കടകളിലാണ് വ്യാഴാഴ്ച രാത്രിയില്‍ മോഷണം നടന്നത്.  
ആലുവ ബാങ്ക് കവലയിലെ പാലസ് റോഡിലെ മേപ്പറത്ത് അബ്ദുല്‍ സലാമിന്റെ ഉടമസ്ഥതയിലുള്ള സിറ്റി ബാറ്ററി ഏജന്‍സീസ്, ഷാജന്റെ ഉടമസ്ഥതയിലുള്ള സെനോറിറ്റ ചില്‍ഡ്രന്‍സ് വിയര്‍, മുഹമ്മദാലിയുടെ ഉടമസ്ഥതയിലുള്ള പുളിക്കല്‍ സ്റ്റോഴ്‌സ് എന്നിവിടങ്ങളിലാണ് കവര്‍ച്ച നടന്നത്.
എല്ലാ സ്ഥാപനങ്ങളുടേയും താഴുകള്‍ തകര്‍ത്താണ് മോഷണം നടന്നത്. ബാറ്ററി ഷോപ്പില്‍ നിന്നും 45,000 രൂപ മോഷ്ടാക്കള്‍ കവര്‍ന്നു. കടയുടെ മേശയില്‍ പൂട്ടിവച്ചിരുന്ന പണം മേശ പൊളിച്ചാണ് മോഷ്ടാക്കള്‍ അപഹരിച്ചത്. സെനോറിറ്റ ഷോപ്പില്‍ നിന്നും ഏതാനും കോയിന്‍സുകള്‍ മാത്രമാണ് നഷ്ടപ്പെട്ടത്. പുളിക്കല്‍ സ്റ്റോഴ്‌സില്‍ നിന്നും 1500 രൂപയും നിരവധി സ്റ്റേഷനറി വസ്തുക്കളും മോഷ്ടിച്ചു. പൊലിസിന്റെ അനാസ്ഥയാണ് മോഷണത്തിന് കാരണമെന്ന് വ്യാപാരികള്‍ പരാതിപ്പെട്ടു.