കളമശേരി: ഇസ്‌ലാമിന്റെ യഥാര്‍ഥ സന്ദേശങ്ങള്‍ മുസ്‌ലിം സമൂഹത്തിന് എത്തിച്ചു കൊടുക്കുക എന്ന ബാധ്യത ഏറ്റെടുത്തു കൊണ്ട് പതിറ്റാണ്ടുകള്‍ക്ക് മുന്‍പ് സ്ഥാപിതമായ സംഘടനയാണ് സമസ്തയെന്ന് എസ്.കെ.എസ്.എസ്.എഫ് സംസ്ഥാന പ്രസിഡന്റ് പാണക്കാട് സയ്യിദ് ഹമീദലി ശിഹാബ് തങ്ങള്‍ പറഞ്ഞു.
എസ്.കെ.എസ്.എസ്.എഫ് എറണാകുളം ജില്ല കമ്മിറ്റി സംഘടിപ്പിച്ച സമസ്ത ആദര്‍ശ സമ്മേളനം ഉദ്ഘാടനം ചെയ്തു പ്രസംഗിക്കുകയായിരുന്നു തങ്ങള്‍. മുന്‍ഗാമികളായ മഹത്തുക്കള്‍ യഥാര്‍ഥ മതം പ്രചരിപ്പിക്കുന്നതിനും സുന്നത്ത് ജമാഅത്തിന്റെ സംരക്ഷണത്തിനും വേണ്ടിയാണ് സമസ്തയ്ക്ക് രൂപം നല്‍കിയതെന്നും തങ്ങള്‍ പറഞ്ഞു. പ്രവാചകന്റെ കാലത്തു തന്നെ ഇസ്‌ലാം പ്രചരിക്കപ്പെട്ട നാടാണ് കേരളം. വിശ്വാസ, ആശയ ആദര്‍ശങ്ങള്‍ പ്രചരിപ്പിക്കുന്നതോടൊപ്പം മഹല്ലുകളില്‍ ഐക്യത്തിന്റെ സന്ദേശം പ്രാവര്‍ത്തികമാക്കാനും സമസ്തയ്ക്ക് സാധിച്ചിരുന്നു.
1920 മുതല്‍ പുതിയ ചിന്താഗതികളും ആശയങ്ങളുമായി പിറവിയെടുത്ത സംഘടനകളാണ് അനൈക്യത്തിന്റെ വിത്തുകള്‍ വിതറാന്‍ തുടങ്ങിയത്. അതോടൊപ്പം തീവ്രവാദ ചിന്താഗതികള്‍ ഉടലെടുക്കുന്നതും ഇത്തരം സംഘടനകള്‍ വന്നതോടെയാണെന്നും തങ്ങള്‍ പറഞ്ഞു. എസ്.കെ.എസ്.എസ്.എഫ് ജില്ലാ പ്രസിഡന്റ് അബ്ദുല്‍ ഖാദര്‍ ഹുദവി അധ്യക്ഷനായി. സമസ്ത ജില്ലാ പ്രസിഡന്റ് ഐ.ബി ഉസ്മാന്‍ ഫൈസി ഉദ്‌ബോധന പ്രസംഗം നടത്തി. സമസ്ത ജില്ലാ ജനറല്‍ സെക്രട്ടറി ഓണമ്പിള്ളി മുഹമദ് ഫൈസി, ഷംസുദ്ദീന്‍ ഫൈസി, എ.എം പരീത്, പി.എം ഫൈസല്‍, ടി.എ ബഷീര്‍, ബക്കര്‍ ഹാജി, അബ്ദുല്‍ സമദ് ദാരിമി തുടങ്ങിയവര്‍ പ്രസംഗിച്ചു. എസ്.കെ.എസ്.എസ്.എഫ് ജില്ലാ ജനറല്‍ സെക്രട്ടറി ടി.എം സിദ്ദിഖ് സ്വാഗതവും ട്രഷറര്‍ കെ.എന്‍ നിയാസ് നന്ദിയും പറഞ്ഞു.