മലപ്പുറം: റഷ്യന്‍ ലോകകപ്പ് ഫുട്‌ബോള്‍ മത്സരത്തിന്റെ വിളംബരമായി മലപ്പുറം ഫുട്‌ബോള്‍ ലവേഴ്‌സ് ഫോറം കോട്ടപ്പടി സ്റ്റേഡിയത്തില്‍ സംഘടിപ്പിച്ച അര്‍ജന്റീന-ബ്രസീല്‍ സ്വപ്ന ഫൈനല്‍ മത്സരം ഇരു ടീമുകളും ഓരോ ഗോളുകള്‍ വീതം സ്‌കോര്‍ ചെയ്തു സമനിലയില്‍ പിരിഞ്ഞു.
ആദ്യ പകുതിയുടെ 19ാം മിനിറ്റില്‍ ബ്രസീലിനായി വാഹിദ് സാലിയാണ് ആദ്യ ഗോള്‍ നേടിയത്. രണ്ടാം പകുതിയുടെ 12ാം മിനിറ്റില്‍ അര്‍ജന്റീന തിരിച്ചടിച്ചു. ഇര്‍ഷാദാണ് ഗോള്‍ നേടിയത്. ഇരു ടീമുകളെയും പിന്തുണയ്ക്കുന്നവര്‍ ജഴ്‌സിയും പതാകകളുമായി സ്റ്റേഡിയത്തില്‍ നിറഞ്ഞിരുന്നു.
മത്സരം പി.കെ കുഞ്ഞാലിക്കുട്ടി എം.പി ഉദ്ഘാടനം ചെയ്തു. ഗോകുലം അസിസ്റ്റന്റ് കോച്ച് ഷാജറുദ്ദീനെ ആദരിച്ചു. ഷൈജു ദാമോദരന്‍, സുരേന്ദ്രന്‍ മങ്കട, സലീം, ഉപ്പൂടന്‍ ഷൗക്കത്ത് സംസാരിച്ചു.