പുളിക്കല്‍: അധ്യയന വര്‍ഷത്തെ മികച്ച പഠനപ്രവര്‍ത്തനങ്ങള്‍ ചേര്‍ത്ത് മെഗാ മാഗസിനുമായി പുത്തൂപ്പാടം എ.എം.എല്‍.പി സ്‌കൂള്‍. ഒരു പുത്തുപ്പാടം സെല്‍ഫി എന്ന കൈയെഴുത്ത് മാഗസിനാണ് പഞ്ചായത്തുതല മികവുത്സവത്തില്‍ ശ്രദ്ധേയമായത്. സ്‌കൂളിലെ മുഴുവന്‍ വിദ്യാര്‍ഥികള്‍ക്കും മാഗസിനില്‍ ഒരു പേജുണ്ടായിരുന്നു. കുട്ടികളുടെ പഠന കഴിവുകളും മികച്ച രചനകളും സൃഷ്ടികളും സൂക്ഷിക്കുന്ന 'പോര്‍ട്ട് ഫോളിയോ'എന്ന സഞ്ചി സ്‌കൂളിലെ ഓരോ വിദ്യാര്‍ഥിക്കും നല്‍കിയിട്ടുണ്ട്. വര്‍ഷാവസാനം പോര്‍ട്ട് ഫോളിയോയില്‍ നിന്ന് മികച്ചവ തെരഞ്ഞെടുത്ത് ഏകദിന ശില്‍പ്പശാലയിലൂടെ ഒരു മെഗാമാഗസിന്‍ ഉണ്ടാക്കുകയായിരുന്നു. വിദ്യാര്‍ഥികള്‍ തന്നെയാണ് പേജുകളുടെ വിന്യാസവും രൂപകല്‍പ്പനയും നിര്‍വഹിച്ചത്. ചെറുകാവ് പഞ്ചായത്ത്തല മികവുത്സവത്തില്‍ മികച്ച കലാപഠന പ്രവര്‍ത്തനമായി മെഗാമാഗസിന്‍ തെരഞ്ഞെടുക്കപ്പെട്ടിട്ടുണ്ട്. ശില്‍പ്പശാലയില്‍ പഞ്ചായത്ത് പ്രസിഡന്റ് ഷെജിനി ഉണ്ണി, വൈസ് പ്രസിഡന്റ് പി.വി.എ ജലീല്‍ സംബന്ധിച്ചു.