നിലമ്പൂര്‍: മൂലക്കുരുവിന് വ്യാജ ചികിത്സ നല്‍കിവന്നതിന് അറസ്റ്റിലായവരില്‍ ഒരാളെ നിലമ്പൂര്‍ കോടതി റിമാന്റ് ചെയ്തു. മറ്റു മൂന്നു പേര്‍ക്ക് ജാമ്യം ലഭിച്ചു. നിലമ്പൂരില്‍ രാജീവ് ക്ലിനിക്ക് നടത്തിയിരുന്ന ബംഗാളിലെ 24 പര്‍ഗാ നോര്‍ത്ത് ശ്യാംനഗര്‍ സ്വദേശി നേതാജിപ്പള്ളി മണിമോഹന്‍ ബിശ്വാസ്(43), ഇയാളുടെ സഹായി ശ്യാംനഗര്‍ സ്വദേശി അജിതാമണ്ണ(24), നിലമ്പൂര്‍ മിനി ബൈപാസ് റോഡിനോട് ചേര്‍ന്ന് കല്ലേമ്പാടത്തെ മാതാ ക്ലിനിക്കിലെ അനൂപ് ബിശ്വാസ്(38), മഞ്ചേരി താണിപ്പാറയില്‍ രാഹുല്‍ ക്ലിനിക് നടത്തിയിരുന്ന ബംഗാളിലെ മില്‍ഗോണ്‍സ് ബസാര്‍ ബരാബറിയാ വില്ലേജിലെ പ്രദീപ് റോയ്(42) എന്നിവരാണ് കഴിഞ്ഞ ദിവസം നിലമ്പൂര്‍, മഞ്ചേരി പൊലിസ് സംഘം അറസ്റ്റ് ചെയ്തിരുന്നത്. ഇതില്‍ നിലമ്പൂര്‍ എ.എസ്.ഐ അറസ്റ്റ് ചെയ്ത അനൂപ് ബിശ്വാസിനെയാണ് നിലമ്പൂര്‍ കോടതി 15 ദിവസത്തേക്ക് റിമാന്റ് ചെയ്തത്. ആള്‍മാറാട്ടം, വിശ്വാസ വഞ്ചന എന്നിവക്കുപുറമേ ഡ്രഗ്‌സ് ആന്റ് കോസ്മറ്റികസ് വകുപ്പിലെ 27 ബി(2) സെക്ഷന്‍ പ്രകാരവും ഇയാള്‍ക്കെതിരെ കേസെടുത്തിരുന്നു. അധികാരപത്രമില്ലാതെ വ്യാജ മരുന്ന് ഉപയോഗിച്ച് ചികിത്സനടത്തുന്നതിനെതിരെയുള്ള വകുപ്പാണിത്. മഞ്ചേരി പൊലിസ് അറസ്റ്റു ചെയ്ത മണിമോഹന്‍ ബിശ്വാസ്, അജിതാമണ്ണ, പ്രദീപ് റോയ് എന്നിവര്‍ക്ക് മഞ്ചേരി ഫസ്റ്റ് ക്ലാസ് മജിസ്‌ട്രേറ്റ് കോടതി ജാമ്യം അനുവദിക്കുകയായിരുന്നു. ഡ്രഗ്‌സ് ആന്റ് കോസ്മറ്റിക് വകുപ്പ് ചേര്‍ത്ത് കേസെടുക്കുന്നതിന് പകരം ഇവര്‍ക്കെതിരെ വിശ്വാസ വഞ്ചനക്കും ആള്‍മാറാട്ടത്തിനുമാണ് പൊലിസ് കേസെടുത്തിരിക്കുന്നത്.