സുല്‍ത്താന്‍ ബത്തേരി: സേവനാവകാശ നിയമത്തെക്കുറിച്ച് ജനങ്ങള്‍ ബോധവാന്മാരാകുന്നതിനനുസരിച്ച് സര്‍ക്കാര്‍ ജീവനക്കാര്‍ ചുമതലാബോധം മെച്ചപ്പെടുത്താന്‍ നിര്‍ബന്ധിതരാകുമെന്ന് അഡ്വ. ജി ബബിത അഭിപ്രായപ്പെട്ടു.  ഇന്‍ഫര്‍മേഷന്‍ ആന്‍ഡ് പബ്ലിക് റിലേഷന്‍സ് വകുപ്പ് സുല്‍ത്താന്‍ ബത്തേരി താലൂക്ക് കോണ്‍ഫറന്‍സ് ഹാളില്‍ സംഘടിപ്പിച്ച സേവനാവകാശം ശില്‍പശാലയില്‍ വിഷയം അവതരിപ്പിച്ച് സംസാരിക്കുകയായിരുന്നു അവര്‍.
സര്‍ക്കാര്‍ ഉദ്യോഗസ്ഥര്‍ യഥാസമയം കാര്യക്ഷമമായി പ്രവര്‍ത്തിക്കാത്തതു കൊണ്ടാണ് ഇത്തരം നിയമങ്ങള്‍ പാസ്സാക്കേണ്ടി വന്നതെന്ന് ശില്‍പശാല ഉദ്ഘാടനം ചെയ്ത സുല്‍ത്താന്‍ ബത്തേരി തഹസില്‍ദാര്‍ എം.ജെ സണ്ണി പറഞ്ഞു. പൊതുജനത്തിന് നിയമസാക്ഷരത വര്‍ധിക്കുന്നതിനനുസരിച്ച് ഉദ്യോഗസ്ഥര്‍ ആലസ്യംവിട്ടുണരേണ്ടിവരുമെന്നും അദ്ദേഹം പറഞ്ഞു.  അഡീ.തഹസില്‍ദാര്‍ വി അബൂബക്കര്‍ അധ്യക്ഷനായി. ജില്ലാ ഇന്‍ഫര്‍മേഷന്‍ ഓഫിസര്‍ കെ.പി അബ്ദുല്‍ ഖാദര്‍, ഹെഡ് ക്വാര്‍ട്ടേഴ്‌സ് ഡെ.തഹസില്‍ദാര്‍ രാമകൃഷ്ണന്‍ സംസാരിച്ചു.