തിരുവനന്തപുരം: എഡിജിപി അജിത് കുമാറിനെതിരെ ഡിജിപി ശൈഖ് ദര്‍വേഷ് സാഹിബ് സമര്‍പ്പിച്ച റിപ്പോര്‍ട്ടില്‍ ഗുരുതര കണ്ടെത്തലുകള്‍. ആര്‍.എസ്.എസ് നേതാക്കളുമായുള്ള കൂടിക്കാഴ്ച്ചയ്ക്ക് പിറകില്‍ ഗൂഢ ലക്ഷ്യങ്ങളുണ്ടെന്നാണ് സംശയം. 

ഡിജിപി പട്ടികയില്‍ ഇടംപിടിക്കാനുള്ള ശ്രമമാണോ കൂടിക്കാഴ്ച്ചക്ക് പിറകില്‍, അതോ ഇതുവരെ കിട്ടാത്ത രാഷ്ട്രപടിയുടെ പൊലിസ് മെഡലിന് വേണ്ടിയോ, ഇതിന് പുറമെ കൂടിക്കാഴ്ച്ചക്ക് പിറകില്‍ രാഷ്ട്രീയ ലക്ഷ്യങ്ങളുണ്ടോ എന്നീ സംശയങ്ങളാണ് ഡിജിപി ഉന്നയിക്കുന്നത്. 

മാത്രമല്ല മണിക്കൂറുകള്‍ നീണ്ട യാത്രയിലും ദുരൂഹതയുണ്ടെന്ന് ഡിജിപി സമര്‍പ്പിച്ച റിപ്പോര്‍ട്ടില്‍ പരാമര്‍ശമുണ്ട്. തിരുവനന്തപുരത്ത് നിന്ന് തൃശൂരിലെ ഒരു സ്‌കൂളിലെത്തി നടത്തിയ കൂടിക്കാഴ്ച്ചയും ദുരൂഹമാണ്. കേരളത്തിലെ പൊതുസമൂഹത്തില്‍ ദത്താത്രേയ ഹൊസബാല എന്ന പേര് പരിചിതമായത് കൂടിക്കാഴ്ച്ചയ്ക്ക് പിന്നാലെയാണെന്നും രാജ്യത്തെ പ്രധാന രാഷ്ട്രീയ നേതാക്കളെ കാണുന്നത് പോലെയല്ല ഇതെന്നും ഡിജിപി റിപ്പോര്‍ട്ടില്‍ വ്യക്തമാക്കിയിട്ടുണ്ട്. ആര്‍.എസ്.എസ് നേതാക്കളുമായുള്ള കൂടിക്കാഴ്ച്ച പൊലിസ് സേനയുടെ സ്വത്വത്തെ ചോദ്യം ചെയ്യുന്നതിന് സമാനമാണെന്നും ഡിജിപി റിപ്പോര്‍ട്ടില്‍ വ്യക്തമാക്കി. 

അല്‍പസമയം മുന്‍പാണ് എഡിജിപി അജിത് കുമാറിനെതിരായ ഡിജിപിയുടെ അന്വേഷണ റിപ്പോര്‍ട്ട് ആഭ്യന്തര സെക്രട്ടറിക്ക് കൈമാറിയത്. എഡിജിപി- ആര്‍.എസ്.എസ് കൂടിക്കാഴ്ച്ച, പിവി അന്‍വറിന്റെ ആരോപണങ്ങള്‍ എന്നിവയെക്കുറിച്ചാണ് റിപ്പോര്‍ട്ടിലുള്ളത്. പിവി അന്‍വര്‍ ആരോപിച്ച റിദാന്‍, മാമി കേസുകളില്‍ പൊലിസിന് അന്വേഷണ വീഴ്ചയുണ്ടായെന്നും, റിദാന്‍ കേസിന്റെ അന്തിമ റിപ്പോര്‍ട്ടില്‍ അന്വേഷണ ഉദ്യോഗസ്ഥര്‍ക്ക് വീഴ്ച സംഭവിച്ചുവെന്നും, കേസിലെ ആദ്യ ഘട്ടത്തില്‍ അന്വേഷണ വീഴ്ചയുണ്ടായെന്നുമാണ് റിപ്പോര്‍ട്ടിലുണ്ട്. 

Serious findings against MR Ajith Kumar in DGPs report