കൊച്ചി: കായലില്‍ മരിച്ച നിലയില്‍ കണ്ടെത്തിയ മിഷേല്‍ ഷാജിയുടെ കൂടുതല്‍ വീഡിയോ ദൃശ്യങ്ങള്‍ പൊലിസിന് ലഭിച്ചു. കലൂര്‍ പള്ളിയിലെത്തി തിരിച്ചുപോകുന്നതുവരെയുള്ള 30 മിനിട്ടോളം വരുന്ന സി.സി.ടി.വി ദൃശ്യങ്ങളാണ് ലഭിച്ചിരിക്കുന്നത്. വൈകിട്ട് 5.40ഓടെ പള്ളിയിലെത്തിയ മിഷേല്‍ 6.12ന് ഇവിടെ നിന്ന് മടങ്ങിയെന്നാണ് പൊലിസ് നിഗമനം. ഏഴ് സി.സി.ടി.വി കാമറകളില്‍ നിന്ന് പൊലിസ് ശേഖരിച്ച ദൃശ്യങ്ങള്‍ കേസ് അന്വേഷിക്കുന്ന ക്രൈംബ്രാഞ്ചിന് കൈമാറി. വിദൂരദൃശ്യങ്ങളാണെങ്കിലും പള്ളിയില്‍ സ്ഥാപിച്ചിരിക്കുന്ന കാമറയില്‍ ആളെ വ്യക്തമായി കാണാന്‍ കഴിയുന്നുണ്ട്.
പള്ളിയില്‍ 20 മിനിട്ടോളം വിനിയോഗിച്ച മിഷേല്‍ പിന്നീട് പുറത്തിറങ്ങി കുരിശ് പള്ളിയുടെ മുന്നിലെത്തി പ്രാര്‍ഥിക്കുന്നത് കാണാം. ഈ കാമറയില്‍ മിഷേലിന്റെ മുഖം വ്യക്തമാണ്. മിഷേല്‍ ഗോശ്രീ പാലത്തിനും സമീപത്തേക്ക് അതിവേഗത്തില്‍ നടന്നുനീങ്ങുന്ന സി.സി.ടി.വി ദൃശ്യവും പൊലിസിന് ലഭിച്ചു. പാലത്തിനു സമീപമുള്ള പഴക്കടയുടെ മുന്നിലൂടെ നീങ്ങുന്ന ദൃശ്യമാണ് ഇവിടെ നിന്ന് ലഭിച്ചത്. കാണാതാകുമ്പോഴുള്ള വസ്ത്രങ്ങളാണ് ധരിച്ചിരിക്കുന്നത്. ഹൈക്കോടതി ജങ്ഷനിലെ ഫ്‌ളാറ്റിലെ കാമറയില്‍ പതിഞ്ഞ ദൃശ്യങ്ങളാണിവ. ഡിവൈ.എസ്.പി കെ.എ ശശിധരന്റെ നേതൃത്വത്തിലുള്ള ക്രൈംബ്രാഞ്ച് സംഘം പിറവത്തെ വീട്ടിലെത്തി മിഷേലിന്റെ മാതാവ് സൈലമ്മയുടെ മൊഴി രേഖപ്പെടുത്തി.