തിരുവമ്പാടി: കഴിഞ്ഞദിവസം കനത്ത മഴയോടൊപ്പം വീശിയടിച്ച ശക്തമായ കാറ്റില്‍ മലയോരത്ത് വ്യാപകനാശം. തിരുവമ്പാടിയില്‍ വീടിന് മേല്‍ മരം വീണ് ഒരാള്‍ക്ക് പരുക്കേറ്റു. ചേപ്പിലംകോട് അകാടത്തില്‍ കോളനിയില്‍ താമസിക്കുന്ന പടിഞ്ഞാറെ മങ്ങാട്ട് ശ്രീധരനാ(65)ണ് പരുക്കേറ്റത്. കഴിഞ്ഞദിവസം രാത്രി പത്തരയോടെ ഇവര്‍ താമസിക്കുന്ന വീടിന് മേല്‍ മരം വീഴുകയായിരുന്നു. വീഴ്ചയില്‍ വീടിന്റെ ഷീറ്റ് തകര്‍ന്ന് പക്ഷാഘാതം പിടിപെട്ട് താഴെ കിടക്കുകയായിരുന്ന ശ്രീധരന്റെ ദേഹത്ത് പതിക്കുകയായിരുന്നു. പരുക്കേറ്റ ശ്രീധരനെ മണാശ്ശേരി കെ.എം.സി.ടി മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു.
ശക്തമായ കാറ്റില്‍ കെ.എസ്.ഇ.ബിയുടെ 11 കെ.വിയുടെ ആറു പോസ്റ്റും 20 എല്‍.ടി പോസ്റ്റും നിലംപൊത്തി. വിവിധ സ്ഥലങ്ങളിലായി അഞ്ഞൂറ് മീറ്ററിലധികം നീളത്തില്‍ വൈദ്യുതിലൈന്‍ പൊട്ടിവീണു. ഇതു മൂലം കെ.എസ്.ഇ.ബിക്ക് അഞ്ചര ലക്ഷം രൂപയുടെ നഷ്ടം ഉണ്ടായി.
കോടഞ്ചേരി തെയ്യപ്പാറ മേഖലയില്‍ കാറ്റില്‍ വ്യാപക നാശനഷ്ടമുണ്ടായി. തേരോട്ടില്‍ അന്നക്കുട്ടിയുടെ വീടിന് മുകളിലേക്ക് മരം ഒടിഞ്ഞുവീണു. ഓടിട്ട മേല്‍ക്കൂര ഭാഗികമായി തകര്‍ന്നു. തെയ്യപ്പാറ അങ്കണവാടിയുടെ മുകളിലേക്ക് മരം കടപുഴകി വീണു. ആസ്ബറ്റോസ് ഷീറ്റിട്ട മേല്‍ക്കൂരക്ക് കേടുപാടുകള്‍ സംഭവിച്ചു. താണേലുമാലില്‍ ജോര്‍ജിന്റെ വീടിന് മുകളിലേക്ക് വൈദുതത്തൂണും മരങ്ങളും ഒടിഞ്ഞുവീണു. തെയ്യപ്പാറ അങ്ങാടിയിലെ അമ്പാട്ട് കുഞ്ഞ്, കരിപ്പാക്കുടി പൗലോസ് എന്നിവരുടെ കടയുടെ മേല്‍ക്കൂര കാറ്റെടുത്തു.
പ്രദേശത്ത് നൂറുകണക്കിന് റബര്‍ മരങ്ങള്‍, തെങ്ങ്, കമുക്, വാഴ, കപ്പ, കൊക്കോ, കശുമാവ്, തേക്ക്, പ്ലാവ് തുടങ്ങിയവയും ശക്തമായ കാറ്റില്‍ നിലംപൊത്തി.ഇലക്ട്രിക് പോസ്റ്റുകള്‍ തകര്‍ന്നതിനാല്‍ വൈദ്യുതബന്ധവും വിച്ഛേദിക്കപ്പെട്ടു.
തെയ്യപ്പാറ സെന്റ് ജോര്‍ജ് പള്ളിയുടെ 18 റബര്‍ മരങ്ങളും ഒരു തെങ്ങും കാറ്റില്‍ നശിച്ചു. താണേലുമാലില്‍ ജോര്‍ജ്കുട്ടി, അബ്രഹാം, എസ്തഫാന്‍, മോസസ്, പോള്‍ ടി. ഐസക്, തേരോട്ടില്‍ അന്നക്കുട്ടി, വടക്കേമറ്റത്തില്‍ വില്‍സണ്‍, തകരക്കാട്ടില്‍ തങ്കച്ചന്‍, കടുകത്തിങ്കല്‍ പോള്‍, ഈഴക്കുന്നേല്‍ സണ്ണി, മോളേല്‍ ജോസ്, വാഴേപറമ്പില്‍ തങ്കച്ചന്‍ എന്നിവരുടെ കൃഷികളാണ് കാറ്റില്‍ നശിച്ചത്. തെയ്യപ്പാറ, കുപ്പായക്കോട്, പാറമല ഭാഗങ്ങളിലെ എട്ടു വൈദ്യുതത്തൂണുകളും കാറ്റില്‍ തകര്‍ന്നു.