ഈരാറ്റുപേട്ട: കളത്തുക്കടവിലും പരിസര പ്രദേശങ്ങളിലും മോഷണം വ്യാപകമാകുന്നു. വ്യാഴാഴ്ച രാത്രി വീട്ടില്‍ ഉറങ്ങിക്കിടന്ന വീട്ടമ്മയുടെ രണ്ട് പവന്റെ മാല മോഷണം പോയി.
ചെറുവള്ളില്‍ പ്രമോദിന്റെ അമ്മയുടെ കഴിത്തില്‍ കിടന്ന മാലയാണ് നഷ്ടപ്പെട്ടത്. വീടിന്റെ അടുക്കളയിലെ ഗ്രില്ല് ഇളക്കി മാറ്റിയാണ് മോഷ്ടാക്കള്‍ വീടിനകത്ത് പ്രവേശിച്ചത്. പ്രദേശത്തെ രണ്ട് വീടുകളില്‍ കഴിഞ്ഞ ദിവസങ്ങളില്‍ മോഷണ ശ്രമം നടന്നിരുന്നു. ശബ്ദം കേട്ട് വീട്ടുകാര്‍ ഉണര്‍ന്നതിനാല്‍ മോഷ്ടാക്കള്‍ ഓടി രക്ഷപെടുകയായിരുന്നു. പൊലിസ് നായ് സ്ഥലത്തെത്തി അന്വേഷണം നടത്തിയെങ്കിലും തെളിവൊന്നും ലഭിച്ചിട്ടില്ലെന്ന് പൊലിസ് പറഞ്ഞു. പ്ലാശനാല്‍ വെട്ടിപ്പറമ്പ് പ്രദേശങ്ങളിലെ വീടുകളില്‍ നിന്നും ജാതിക്ക, ഒട്ടുപാല്‍ തുടങ്ങിയവ മോഷണം പോകുക പതിവാണ്. പൊലിസ് രാത്രികാല പട്രോളിങ് ശക്തമാക്കെമെന്നു നാട്ടുകാര്‍ ആവശ്യപ്പെട്ടു.