പാരിസ്: യൂറോ കപ്പില്‍ ഇന്നലെ നടന്ന രണ്ടാം മത്സരത്തില്‍ ഉത്തര അയര്‍ലന്‍ഡിനെ എതിരില്ലാത്ത ഒരു ഗോളിന് വീഴ്ത്തി വെയ്ല്‍സ് ക്വാര്‍ട്ടറില്‍ കടന്നു. 75ാം മിനുട്ടില്‍ ഉത്തര അയര്‍ലന്‍ഡ് താരം ഗരത് മക്ഓലിയുടെ സെല്‍ഫ് ഗോളാണ് വെയ്ല്‍സിന് തുണയായത്.
ബെയ്‌ലിന്റെ ക്രോസ് പ്രതിരോധിക്കുന്നതിനിടെ മക്ഓലിയുടെ കാലില്‍ തട്ടി പന്ത് വലയില്‍ കയറുകയായിരുന്നു. മക്ഓലിയ്ക്ക് പന്ത് നഷ്ടമായിരുന്നെങ്കില്‍ ഹാല്‍ റോബ്‌സന്‍ കാനു വെയ്ല്‍സിനായി ലക്ഷ്യം കാണുമായിരുന്നു. ചരിത്രത്തില്‍ ആദ്യമായിട്ടാണ് വെയ്ല്‍സ് യൂറോ കപ്പിന്റെ ക്വാര്‍ട്ടറിലെത്തുന്നത്. ഹംഗറി-ബെല്‍ജിയം മത്സരത്തിലെ വിജയികളാവും വെയ്ല്‍സിന് ക്വാര്‍ട്ടറില്‍ എതിരാളി.