തിരുവനന്തപുരം: സംവരണ സീറ്റില്‍ മത്സരിച്ച് ജയിച്ച ശേഷം മണ്ഡലത്തെ തിരിഞ്ഞുനോക്കാത്ത എം.എല്‍.എമാരെ വഴിയില്‍ തടയുമെന്ന് അംബേദ്കര്‍ ജനപരിഷത്ത് ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു. ജയിക്കുന്നതു വരെ പട്ടികജാതിയും ജയിച്ചാല്‍ തമ്പ്രാക്കന്‍മാരുമാവുകയാണ് സംവരണ എം.എല്‍.എമാര്‍. ഇവരെ തെരുവില്‍ തടഞ്ഞ് ജനകീയ വിചാരണ ചെയ്യും.
പട്ടികജാതി-വര്‍ഗക്കാരുടെ ക്ഷേമപ്രവര്‍ത്തനങ്ങള്‍ക്കായുള്ള കിര്‍ത്താഡ്‌സിന്റെ നിലവിലെ പ്രവര്‍ത്തനങ്ങള്‍ ദുരൂഹമാണ്. പട്ടികജാതി-വര്‍ഗക്കാരുടെ വായ്പകള്‍ക്ക് സര്‍ഫാസി നിയമം ബാധകമാക്കരുതെന്നും ദാരിദ്ര്യ രേഖയ്ക്ക് താഴെയുള്ള പട്ടികവിഭാഗക്കാരുടെ വായ്പകള്‍ എഴുതിത്തള്ളാന്‍ അടിയന്തര നടപടികള്‍ കേന്ദ്രസര്‍ക്കാര്‍ സ്വീകരിക്കണമെന്നും ആവശ്യപ്പെട്ട് ഏപ്രില്‍ 10ന് പാര്‍ലമെന്റിന് മുന്നില്‍ കൂട്ടധര്‍ണ നടത്തുമെന്നും ജനപരിഷത്ത് ഭാരവാഹികളായ രാംദാസ്, ലത വിഴിഞ്ഞം എന്നിവര്‍ വാര്‍ത്താസമ്മേളനത്തില്‍ അറിയിച്ചു.