പാറശാല: ദേശീതപാതയില്‍ പാറശാല, പുവാര്‍, കളിയിക്കാവിള തുടങ്ങിയ ഭാഗങ്ങളില്‍ സമാന്തര സര്‍വിസ് നടത്തുന്ന വാഹനങ്ങള്‍ കുട്ടികളെയും വയോധികരെയും അപകടം വരുത്തും വിധം വാഹനത്തില്‍ കയറ്റി സര്‍വിസ് നടത്തുന്നതായി ആക്ഷേപം. യാത്രക്കാരെ കുത്തി നിറച്ചു കൊണ്ടുള്ള ഇത്തരം യാത്ര അപകടം ക്ഷണിച്ചു വരുത്തുന്നതായും അധികൃതര്‍ ഇതിനെതിരേ യാതൊരുവിധ നടപടികളും കൈ കൊള്ളുന്നില്ലെന്നും നാട്ടുകാര്‍ പരാതിപ്പെടുന്നു.
സ്‌കൂള്‍ കുട്ടികളെ കൊണ്ട് പോകുന്ന പല ഓട്ടോറിക്ഷകളും ഡ്രൈവറുടെ സീറ്റിന് ഇരുവശത്തായും സ്‌കൂള്‍ കുട്ടികളെ ഇരുത്തിയും നിറുത്തിയും യാത്ര ചെയ്യുന്നതും നിത്യ കാഴ്ചയാണ്. കൂടാതെ ഇട റോഡുകളിലൂടെ സ്വകാര്യ സ്‌കൂള്‍ വാഹനങ്ങളും സ്വകാര്യ എന്‍ജിനിയറിങ് കോളജുകളിലെ ബസുകളും അമിത വേഗത്തിലും ഡ്രൈവര്‍മാര്‍ ഡ്രൈവിങിനിടെ മൊബൈല്‍ ഫോണ്‍ ഉപയോഗിച്ചും വാഹന മോടിക്കുന്നതും നിത്യ സംഭവങ്ങളാണ്. ഇതിനെതിരെ അധികൃതര്‍ നടപടി കൈകൊള്ളണമെന്നും നാട്ടുകാര്‍ ആവശ്യപ്പെടുന്നു.