തേഞ്ഞിപ്പലം:കാലിക്കറ്റ് സര്‍വകലാശാലക്ക് കീഴിലുളള കോളജുകളില്‍ ഏകജാലക ബിരുദ പ്രവേശനം ഇന്നലെ മുതല്‍ ആരംഭിച്ചെങ്കിലും വെബ് ലിങ്ക് വൈകി തുറന്നതിനാല്‍ പലര്‍ക്കും ഫീസടക്കാനായില്ല.ഈ മാസം 30 വരെയാണ് രജിസ്‌ട്രേഷന്‍ ഫീസടക്കാനുള്ള സമയം.സര്‍വകലാശാലക്ക് കീഴിലുളള കോളജുകളിലായി ആകെയുളള 56,000 സീറ്റില്‍ 35,000 സീറ്റ് മെറിറ്റടിസ്ഥാനത്തിലും ബാക്കിയുളളത് സ്വാശ്രയ കോളജുകള്‍ വഴിയുമാണ്. മൂന്ന് അലോട്‌മെന്റിനുളളില്‍ പ്രവേശന നടപടികള്‍ തീര്‍ക്കാനാണ് സര്‍വകലാശാല തീരുമാനം.ആദ്യ അലോട്‌മെന്റ് ജൂണ്‍ 13 നും19നും 27നും രണ്ടും മൂന്നും അലോട്‌മെന്റുകളും നടക്കും. ജൂലൈ 2ന് ക്ലാസുകള്‍ ആരംഭിക്കും.
ആദ്യ മൂന്ന് അലോട്‌മെന്റുകള്‍ക്ക് ശേഷം ആവശ്യമെങ്കില്‍ സ്‌പെഷ്യല്‍ അലോട്‌മെന്റുണ്ടായിരിക്കും. ട്രയല്‍ അലോട്‌മെന്റ് ജൂണ്‍ 7നും ഒപ്ഷനുകള്‍ പൂര്‍ത്തീകരിക്കാന്‍ രണ്ട് ദിവസമാണ് സമയം അനുവദിക്കുക. ജനറല്‍ വിഭാഗത്തിന് 265 രൂപയും എസ്.സി -എസ്.ടി വിഭാഗത്തിന് 105 രൂപയുമാണ് ഫീസ്.