കൊച്ചി: ഭിന്നശേഷികളുള്ള കലാകാരന്മാരെ അണിനിരത്തി എറണാകുളം അങ്കമാലി അതിരൂപതയുടെ സാമൂഹിക പ്രവര്‍ത്തന വിഭാഗമായ സഹൃദയ രൂപീകരിച്ച സഹൃദയ മെലഡീസ് നൂറു വേദികള്‍ പൂര്‍ത്തിയാക്കിയതിന്റെ ഭാഗമായി കലാകാരന്മാരെ ആദരിക്കും. നാളെ വൈകിട്ട് ആറിന് ടൗണ്‍ ഹാളില്‍ നടക്കുന്ന പുരസ്‌കാര സന്ധ്യയില്‍ മന്ത്രി കെ.കെ ഷൈലജ, എം.എല്‍.എമാരായ ഹൈബി ഈഡന്‍, പി.ടി തോമസ്, മേയര്‍ സൗമിനി ജെയിന്‍, മാര്‍ സെബാസ്റ്റിയന്‍ എടയന്ത്രത്ത് തുടങ്ങിയവര്‍ പങ്കെടുക്കും. ഭിന്നശേഷിയുള്ളവര്‍ക്ക് തടസരഹിത സാഹചര്യങ്ങളും ക്ഷേമ, പുനഃരധിവാസ സൗകര്യങ്ങളും ഉറപ്പാക്കുന്നതിനായി സഹൃദയ ആരംഭിക്കുന്ന എബിലിറ്റി സെന്ററിന്റെ പ്രവര്‍ത്തനങ്ങള്‍ക്ക് പുരസ്‌കാര സന്ധ്യയില്‍ തുടക്കം കുറിക്കും. ഫാ. പോള്‍ ചെറുപിള്ളി, ജീസ് പി.പോള്‍, അനൂപ് ആന്റണി എന്നിവര്‍ വാര്‍ത്താസമ്മേളനത്തില്‍ പങ്കെടുത്തു.