മഡ്ഗാവ്: നിലവിലെ ചാംപ്യന്‍മാരായ സര്‍വിസസിനെ 2-1നു വീഴ്ത്തി ആതിഥേയരായ ഗോവ 71ാം സന്തോഷ് ട്രോഫി ഫുട്‌ബോളിന്റെ സെമിയിലേക്കു മുന്നേറി. മറ്റൊരു മത്സരത്തില്‍ ബംഗാള്‍ മറുപടിയില്ലാത്ത രണ്ടു ഗോളുകള്‍ക്ക് മേഘലയയെ കീഴടക്കി. ബംഗാള്‍ നേരത്തെ തന്നെ സെമി ബര്‍ത്ത് ഉറപ്പാക്കിയിരുന്നു. ജയത്തോടെ അവര്‍ പത്തു പോയിന്റുമായി ഗ്രൂപ്പ് ചാംപ്യന്‍മാരായാണ് അവസാന നാലിലെത്തിയത്. ഗോവ എട്ടു പോയിന്റോടെ രണ്ടാം സ്ഥാനക്കാരായാണു സെമി ബര്‍ത്ത് ഉറപ്പിച്ചത്. നാലു കളികളില്‍ ഒരോ ജയവും സമനിയും രണ്ടു തോല്‍വിയും പിണഞ്ഞ് സര്‍വിസസും നാലില്‍ മൂന്നു തോല്‍വിയും ഒരു വിജയവുമായി മേഘാലയയും പുറത്തായി.

ആദ്യ പത്തു മിനുട്ടിനുള്ളില്‍ ഒരു ഗോള്‍ വഴങ്ങിയ ഗോവ പത്തു പേരായി ചുരുങ്ങിയ സര്‍വിസസിനെ അവസാന പത്തു മിനുട്ടിനുള്ള നേടിയ രണ്ടു ഗോളുകളിലാണു പരാജയപ്പെടുത്തിയത്. 82ാം മിനുട്ടില്‍ അകെരാജ് മാര്‍ട്ടിന്‍സും 89ാം മിനുട്ടില്‍ ഫെര്‍ണാണ്ടസും ഗോവയ്ക്കായി വല കുലുക്കി.
ഇരു പകുതികളിലായാണു ബംഗാള്‍ ഗോളുകള്‍ നേടിയത്. എട്ടാം മിനുട്ടില്‍ ഷെയ്കം റൊണാള്‍ഡ് സിങും 84ാം മിനുട്ടില്‍ മന്‍വിര്‍ സിങും ബംഗാളിനായി വല കുലുക്കി.

സെമി ഉറപ്പിച്ച കേരളം അവസാന ഗ്രൂപ്പ്
പോരിന് ഇന്നിറങ്ങും
മഡ്ഗാവ്: ഇന്നു നടക്കുന്ന ബി ഗ്രൂപ്പിലെ അവസാന മത്സരത്തില്‍ കേരളം മഹാരാഷ്ട്രയുമായും റെയില്‍വേസ് മിസോറമുമായും ഏറ്റുമുട്ടും. കേരളം സെമി ഉറപ്പാക്കി ഇറങ്ങുമ്പോള്‍ റെയില്‍വേസ്- മിസോറം മത്സരത്തിലെ വിജയികള്‍ക്ക് ഫലം നിര്‍ണായകമാകും. നിലവില്‍ നാലു കളികള്‍ പൂര്‍ത്തിയാക്കി അഞ്ചു പോയിന്റുമായി പഞ്ചാണു രണ്ടാം സ്ഥാനത്ത്. മിസോറം- റെയില്‍വേസ് പോരാട്ടം സമനിലയില്‍ അവസാനിക്കുകയും മഹാരാഷ്ട്ര കേരളത്തെ കീഴടക്കുകയും ചെയ്താല്‍ മഹാരാഷ്ട്രയ്ക്ക് സെമിയിലേക്കു കടക്കാം. മഹാരാഷ്ട്ര തോല്‍ക്കുകയും മിസോറം- റെയില്‍വേസ് പോരിലെ ഒരു ടീം വിജയം സ്വന്തമാക്കുകയും ചെയ്താല്‍ വിജയിക്കുന്നവര്‍ക്ക് അവസാന നാലിലെത്താം. രണ്ടു മത്സരങ്ങളും സമനിലയില്‍ അവസാനിച്ചാല്‍ മിസോറമും പഞ്ചാബും തമ്മിലുള്ള ഗോള്‍ ശരാശരി രണ്ടാം സ്ഥാനക്കാരെ നിര്‍ണയിക്കും.