ഇന്ത്യന്‍ വെല്‍സ്: സ്വിറ്റ്‌സര്‍ലന്‍ഡ് ഇതിഹാസം റോജര്‍ ഫെഡറര്‍ക്ക് ഇന്ത്യന്‍ വെല്‍സ് മാസ്റ്റേഴ്‌സ് ടെന്നീസ് കിരീടം. ഫൈനലില്‍ നാട്ടുകാരനും ഡബിള്‍സ് പങ്കാളിയുമായ സ്റ്റാനിസ്ലാസ് വാവ്‌റിങ്കയെ കീഴടക്കിയാണു ഫെഡറര്‍ അഞ്ചാം ഇന്ത്യന്‍ വെല്‍സ് കിരീടത്തില്‍ മുത്തമിട്ടത്. രണ്ടു സെറ്റ് മാത്രം നീണ്ട പോരാട്ടത്തില്‍ അനായാസമായാണു ഫെഡ് എക്‌സ്പ്രസ് വിജയത്തിലേക്കു കുതിച്ചത്. സ്‌കോര്‍: 6-4, 7-5.
ഇതോടെ ഏറ്റവും കൂടുതല്‍ തവണ ഇന്ത്യന്‍ വെല്‍സ് ടെന്നീസ് കിരീടം നേടുന്ന താരമെന്ന ലോക രണ്ടാം നമ്പര്‍ താരം സെര്‍ബിയയുടെ നൊവാക് ദ്യോക്കോവിചിന്റെ റെക്കോര്‍ഡിനൊപ്പമെത്താന്‍ ഫെഡറര്‍ക്കു സാധിച്ചു. നേരത്തെ 2004, 2005, 2006, 2012 വര്‍ഷങ്ങളില്‍ ഫെഡറര്‍ ചാംപ്യനായിരുന്നു. വിജയത്തോടെ മറ്റൊരു നേട്ടവും ഫെഡറര്‍ ഒപ്പം ചേര്‍ത്തു. എ.ടി.പി കിരീടം നേടുന്ന ഏറ്റവും പ്രായം കൂടിയ താരമെന്ന റെക്കോര്‍ഡാണു ഇന്ത്യന്‍ വെല്‍സില്‍ താരം സ്വന്തമാക്കിയത്. 35 വയസായ ഫെഡറര്‍, 2004ല്‍ 34ാം വയസില്‍ സിന്‍സിനാറ്റി കിരീടം നേടി അമേരിക്കന്‍ ഇതിഹാസം ആന്ദ്രെ അഗാസി സ്ഥാപിച്ച റെക്കോര്‍ഡാണു മറികടന്നത്.