കോഴിക്കോട്: സമസ്തയുടെ മദ്‌റസകളിലെ അധ്യാപകര്‍ക്കായി ജംഇയ്യത്തുല്‍ മുഅല്ലിമീന്‍ സെന്‍ട്രല്‍ കൗണ്‍സില്‍ നല്‍കിവരുന്ന സര്‍വിസ് ആനുകൂല്യം വിതരണത്തിനു സജ്ജമായി. അപേക്ഷകരില്‍നിന്നും തെരഞ്ഞെടുത്ത അധ്യാപകര്‍ക്കായി 55 ലക്ഷം രൂപയാണ് അനുവദിച്ചിട്ടുള്ളത്. ആനുകൂല്യം ലഭിച്ചവര്‍ക്ക് വിവരം മൊബൈല്‍ ഫോണ്‍വഴി സന്ദേശമായി അയക്കും.
ആനുകൂല്യ വിതരണത്തിന്റെ സംസ്ഥാനതല ഉദ്ഘാടനം നാളെ പാണക്കാട്ട് വച്ച് സയ്യിദ് ഹൈദരലി ശിഹാബ് തങ്ങള്‍ നിര്‍വഹിക്കും. ബുധനാഴ്ച രാവിലെ 10 മുതല്‍ മലപ്പുറം സുന്നി മഹല്‍, കണ്ണൂര്‍ ഇസ്‌ലാമിക് സെന്റര്‍, എടരിക്കോട് മുനവ്വിറുല്‍ ഇസ്‌ലാം മദ്‌റസ, കോഴിക്കോട് മുഅല്ലിം സെന്റര്‍, കല്‍പ്പറ്റ ജില്ലാ ഓഫിസ്, തൃശൂര്‍ എം.ഐ.സി, പാലക്കാട് ചെര്‍പ്പുളശ്ശേരി, കാസര്‍കോഡ് ജില്ലാ ഓഫിസ് എന്നിവിടങ്ങളിലും തുടര്‍ന്ന് ചേളാരി സമസ്താലയത്തിലും വിതരണം നടക്കും. അധ്യാപകര്‍ ഒറിജിനല്‍ മുഅല്ലിം സര്‍വിസ് റജിസ്റ്ററുമായി വന്നു തുക കൈപ്പറ്റണമെന്ന് സെക്രട്ടറി അറിയിച്ചു.