മലപ്പുറം: ഉപതെരഞ്ഞെടുപ്പില്‍ സി.പി.ഐയുടെ വോട്ട് യു.ഡി.എഫ് സ്ഥാനാര്‍ഥി പി.കെ കുഞ്ഞാലിക്കുട്ടിക്കു കിട്ടുമെന്ന് കോണ്‍ഗ്രസ് നേതാവ് ആര്യാടന്‍ മുഹമ്മദ്. പി.കെ കുഞ്ഞാലിക്കുട്ടി പത്രിക സമര്‍പ്പിക്കുന്നതിനു മുന്‍പു ഡി.സി.സി ഓഫിസില്‍ മാധ്യമപ്രവര്‍ത്തകരോട് സംസാരിക്കുകയായിരുന്നു അദ്ദേഹം.
സി.പി.ഐക്കാരുടെ മുഴുവന്‍ വോട്ടും എല്‍.ഡി.എഫ് സ്ഥാനാര്‍ഥിക്കു ലഭിക്കുമെന്നു കരുതുന്നില്ല. റെക്കോര്‍ഡ് ഭൂരിപക്ഷത്തിനു കുഞ്ഞാലിക്കുട്ടി ജയിച്ചുകയറും. സി.പി.എമ്മിന്റെ മേധാവിത്വത്തോടുള്ള എതിര്‍പ്പ് ഈ തെരഞ്ഞെടുപ്പിലൂടെ സി.പി.ഐ അറിയിക്കുമെന്നും ആര്യാടന്‍ പറഞ്ഞു. സി.പി.ഐയുമായി കോണ്‍ഗ്രസ് ധാരണയുണ്ടാക്കിയിട്ടുണ്ടോ എന്ന ചോദ്യത്തിന് ഇല്ലെന്നായിരുന്നു മറുപടി.
മലപ്പുറത്ത് എല്‍.ഡി.എഫ് വിജയിക്കുകയാണെങ്കില്‍ രാഷ്ട്രീയ പ്രവര്‍ത്തനം മതിയാക്കുമെന്നും അദ്ദേഹം പറഞ്ഞു.
എന്നാല്‍, ആര്യാടന്‍ മുഹമ്മദിന് അത്തുംപിത്തുമാണെന്നും അതുകൊണ്ടാണ് ഇത്തരം വിഡ്ഢിത്തങ്ങള്‍ പറയുന്നതെന്നും സി.പി.ഐ ജില്ലാ സെക്രട്ടറി പി.പി സുനീര്‍ പറഞ്ഞു. ഈ അസുഖത്തിന് ആര്യാടന്‍ അടിയന്തിരമായി ചികിത്സ തേടണമെന്നും കോണ്‍ഗ്രസില്‍ വി.വി പ്രകാശിനെപ്പോലുള്ളവരാണ് അഭിപ്രായം പറയേണ്ടതെന്നും അദ്ദേഹം പറഞ്ഞു.