കോഴിക്കോട്: എക്‌സൈസ് എന്‍ഫോഴ്‌സ്‌മെന്റ് ആന്‍ഡ് ആന്റി നാര്‍ക്കോട്ടിക് സ്‌പെഷല്‍ സ്‌ക്വാഡ് എക്‌സൈസ് ഇന്‍സ്‌പെക്ടര്‍ പി. മുരളീധരനും സംഘവും നടത്തിയ റെയ്ഡില്‍ അഞ്ചുകിലോഗ്രാം കഞ്ചാവുമായി രണ്ട് ഒഡിഷ സ്വദേശികള്‍ പിടിയിലായി. ഒഡിഷ, ബീഹാര്‍, ആന്ധ്രാപ്രദേശ് എന്നിവിടങ്ങളില്‍ നിന്നു വന്‍തോതില്‍ കഞ്ചാവ് കേരളത്തിലേക്ക് കടത്തുന്നതായുള്ള രഹസ്യവിവരത്തിന്റെ അടിസ്ഥാനത്തില്‍ ജില്ലയുടെ വിവിധ ഭാഗങ്ങളില്‍ നടത്തിയ പരിശോധനയിലാണ് കെട്ടിട നിര്‍മാണ തൊഴിലാളികള്‍ എന്ന വ്യാജേന താമരശ്ശേരി ഭാഗത്തു താമസിച്ച് കഞ്ചാവ് മൊത്തവിതരണം നടത്തുന്ന നരഹരി ഗൗഡ, ടൂണ പ്രധാന്‍ എന്നിവര്‍ എക്‌സൈസിന്റെ പിടിയിലായത്.
ദിവസങ്ങളായി നിരീക്ഷണത്തിലായിരുന്ന ഇവരെ ആവശ്യക്കാരെന്ന വ്യാജേന എക്‌സൈസ് സംഘം കിലോഗ്രാമിന് 15,000 രൂപക്ക് കച്ചവടം ഉറപ്പിച്ച് സാമ്പിള്‍ കാണണമെന്ന് ആവശ്യപ്പെടുകയും തുടര്‍ന്നു രഹസ്യമായി പിന്‍തുടര്‍ന്ന് താവളം കണ്ടെത്തി കഞ്ചാവുമായി പിടികൂടുകയുമായിരുന്നു. പ്രിവന്റീവ് ഓഫിസര്‍മാരായ പി. മനോജ്, പി. വിനോദ്, സിവില്‍ എക്‌സൈസ് ഓഫിസര്‍മാരായ സി. രാമകൃഷ്ണന്‍, യു.പി മനോജ് കുമാര്‍, ധനീഷ്, രജ്ഞിത്ത്, ഗംഗാധരന്‍, റിഷിത്ത് കുമാര്‍, രാജു, അനില്‍കുമാര്‍, അവിനാശ്, ബിജുമോന്‍, ഉല്ലാസ് തുടങ്ങിയവരും എക്‌സൈസ് ഇന്‍സ്‌പെക്ടറോടൊപ്പം സംഘത്തില്‍ ഉണ്ടായിരുന്നു.