ന്യൂഡല്‍ഹി: കോണ്‍ഗ്രസ് ഉപാധ്യക്ഷന്‍ രാഹുല്‍ ഗാന്ധിയെ ഗിന്നസ് ബുക്കില്‍ ചേര്‍ക്കണമെന്ന് ആവശ്യം. മധ്യപ്രദേശിലെ എന്‍ജിനീയറിംഗ് വിദ്യാര്‍ഥിയാണ് ഈ ആവശ്യമുന്നയിച്ച് ഗിന്നസ് ബുക്ക് ഓഫ് വേള്‍ഡ് റെക്കോര്‍ഡ്‌സിനു കത്തെഴുതിയത്.

എന്നാല്‍ ആവശ്യം കേട്ടു രാഹുലിനോടുള്ള ആരാധനയുടെ പുറത്താണ് ഇയാള്‍ കത്തെഴുതിയതെന്നു വിചാരിക്കരുത്. ഏറ്റവും കൂടുതല്‍ തോല്‍വി ഏറ്റുവാങ്ങിയ ആള്‍ എന്നനിലയിലുള്ള 'ബഹുമതി'ക്കാണ് രാഹുലിനെ പരിഗണിക്കണമെന്ന് വിദ്യാര്‍ഥി ആവശ്യപ്പെട്ടിരിക്കുന്നത്.

ഹൊസങ്കാബാദ് സ്വദേശിയായ വിശാല്‍ ദിവാന്‍ എന്ന വിദ്യാര്‍ഥി പറയുന്നതനുസരിച്ച് അടുത്തിടെ രാജ്യത്തു നടന്ന തെരഞ്ഞെടുപ്പുകളില്‍ 27 തവണയാണ് രാഹുല്‍ ഗാന്ധി നേതൃത്വം നല്‍കിയ കോണ്‍ഗ്രസ് പരാജയപ്പെട്ടത്.

തന്റെ അപേക്ഷ ഗിന്നസ് റെക്കോര്‍ഡ് അധികാരികള്‍ സ്വീകരിച്ചതായും ഇതു സംബന്ധിച്ചുള്ള കത്ത് തനിക്കു കിട്ടിയതായും വിശാല്‍ പറയുന്നു. എന്നാല്‍ വിശാലിന്റെ പരാതി സ്വീകരിച്ചതു സംബന്ധിച്ച് ഗിന്നസ് അധികൃതര്‍ നിലപാട് വ്യക്തമാക്കിയിട്ടില്ല.