പോര്‍ട്ട്‌ബ്ലെയര്‍: നന്തി ജാമിഅ ദാറുസ്സലാമിന് കീഴില്‍ ആന്‍ഡമാന്‍ ദ്വീപല്‍ ഓഫ് കാംപസ് തുടങ്ങി. സുന്നി മുസ്‌ലിം ജമാഅത്തിന് കീഴില്‍ പോര്‍ട്ട്‌ബ്ലെയറിനടുത്ത വിംബര്‍ലിഗഞ്ചില്‍ പ്രവര്‍ത്തിച്ചു വരുന്ന റൗളത്തുല്‍ ഉലൂം അറബിക് കോളജാണ് ഓഫ് കാംപസാക്കി ഉയര്‍ത്തിയത്. വിവിധ കോഴ്‌സുകളുടെ ഔദ്യോഗിക പ്രഖ്യാപനം പാണക്കാട് സയ്യിദ് ഹൈദരലി ശിഹാബ് തങ്ങള്‍ നിര്‍വഹിച്ചു. ഹിഫ്‌ളുല്‍ ഖുര്‍ആന്‍, തര്‍ഖിയതുല്‍ ഹുഫ്ഫാസ്, ദഅ്‌വാ എന്നീ കോഴ്‌സുകള്‍ക്കാണ് നിലവില്‍ അംഗീകാരം നല്‍കിയത്.
വിംബര്‍ലിഗഞ്ചില്‍ നടന്ന എസ്.എം.ജെ ഗോള്‍ഡന്‍ ജൂബിലി സമ്മേളനത്തില്‍ സയ്യിദ് ഹൈദരലി ശിഹാബ് തങ്ങള്‍ രേഖകള്‍ ആര്‍.യു.എ.സി പ്രസിഡന്റ് ഹനീഫിന് കൈമാറി. മതരംഗത്ത് കടല്‍ കടക്കാതെ ഉപരിപഠനമെന്ന ആന്‍ഡമാന്‍ മുസ്‌ലിംകളുടെ ദീര്‍ഘകാല സ്വപ്നമാണ് ഇതോടെ സാക്ഷാല്‍ക്കരിക്കപ്പെട്ടതെന്ന് തങ്ങള്‍ പറഞ്ഞു.
എ.വി അബ്ദറഹ്മാന്‍ മുസ്‌ലിയാര്‍ അധ്യക്ഷനായിരുന്നു. കോഴിക്കോട് ഖാസി സയ്യിദ് നാസിര്‍ അബ്ദുല്‍ ഹയ്യ് ശിഹാബ് തങ്ങള്‍, അക്കാദമിക് കൗണ്‍സിലര്‍ അല്‍ഹാഫിള് ശകീര്‍ ഹൈതമി കീച്ചേരി, എസ്.വൈ.എസ് സ്‌റ്റേറ്റ് സെക്രട്ടറി അബ്ദുസ്സമദ് പൂക്കോട്ടൂര്‍, അബ്ദുല്‍ ഗഫൂര്‍ ഖാസിമി കുണ്ടൂര്‍, മുഫത്തിശ് അബ്ദുറസാഖ് ഫൈസി, സൈനുദ്ദീന്‍ സാഹിബ് സ്റ്റുവര്‍ട്ട് ഗഞ്ച്്, ആന്‍ഡമാന്‍ റെയ്ഞ്ച് ജംഇയ്യത്തുല്‍ മുഅല്ലിമീന്‍ പ്രസിഡന്റ് സുലൈമാന്‍ ഫൈസി, അന്‍വര്‍ വാഫി തുടങ്ങിയവര്‍ പ്രസംഗിച്ചു. എസ്.എം.ജെ കോ ഓര്‍ഡിനേറ്റര്‍ അബ്ദുറഫീഖ് അല്‍ഖാസിമി സ്വാഗതവും ഓര്‍ഗനൈസിങ് സെക്രട്ടറി എ.പി ജാബിര്‍ നന്ദിയും പറഞ്ഞു.