മുവാറ്റുപുഴ: പോസ്റ്റ് ഓഫിസ് ജങ്ഷനിലെ നഗരസഭ കെട്ടിടങ്ങളില്‍ നിന്നും കാനയിലേക്ക് കൂടുതല്‍ കക്കൂസ് മാലിന്യക്കുഴലുകള്‍ വച്ചിരിക്കുന്നത് കണ്ടെത്തിയതോടെ ശുചീകരണ പ്രവര്‍ത്തനം പാതിവഴിയില്‍ ഉപേക്ഷിച്ച് കാന മൂടാന്‍ അധികാരികളുടെ ശ്രമം. നാട്ടുകാര്‍ ഇടപെട്ടതോടെ സംഭവം സംഘര്‍ഷത്തില്‍ കലാശിച്ചു.
മഴവെള്ളം ഒഴുക്കുന്നതിനായി നിര്‍മിച്ച കെ.എസ്.ടി.പി കാനയില്‍ മാലിന്യങ്ങള്‍ അടഞ്ഞു കൂടിയതിനേ തുടര്‍ന്ന് വൃത്തിയാക്കുന്നതിനായാണ് സ്ലാബുകള്‍ ജെ.സി.ബി ഉപയോഗിച്ച് നീക്കം ചെയ്തത്. അപ്പോഴാണ് നഗരസഭ കെട്ടിടങ്ങളിലെ കക്കൂസ് മാലിന്യങ്ങള്‍ ഒഴുക്കുന്ന പൈപ്പുകള്‍ കാനകളിലേക്ക് അനധികൃതമായി വച്ചിരിക്കുന്നത് കണ്ടത്.
ഇതേതുടര്‍ന്ന് മാലിന്യക്കുഴലുകള്‍ നീക്കുന്നതിന് പരിസ്ഥിതി സംഘടനയായ ഗ്രീന്‍ പീപ്പിള്‍ പരാതി നല്‍കിയിരുന്നു. തുടര്‍ന്ന് കൂടുതല്‍ മാലിന്യക്കുഴലുകള്‍ കണ്ടെത്താന്‍ തുടങ്ങിയതോടെയാണ് അധികൃതര്‍ കഴിഞ്ഞദിവസം രാത്രി വൈകി ജെ.സി.ബിയുമായി വന്ന് ആരുമറിയാതെ കാന മൂടാന്‍ ശ്രമിച്ചത്.
എന്നാല്‍ വിവരമറിഞ്ഞെത്തിയ നാട്ടുകാരും ഗ്രീന്‍ പീപ്പിള്‍ പ്രവര്‍ത്തകരും വാഹനം തടഞ്ഞു പണികള്‍ നിര്‍ത്തിവപ്പിച്ചു. എന്നാല്‍ രാത്രി മൂന്നര മണിയോടെ വീണ്ടും വാഹനവുമായി വന്നെത്തി കാനകള്‍ മൂടി.
നൂറിലേറെ മുറികളുള്ള മുനിസിപ്പല്‍ കെട്ടിടത്തിന് സെപ്റ്റിക് ടാങ്കില്ലെന്ന വിവരമാണ് ഇതോടെ പുറത്ത് വന്നിരിക്കുന്നത്. ഇവിടത്തെ കക്കൂസുകളില്‍ നിന്നും കുഴല്‍ നേരിട്ട് കാനയിലേക്കാണ് വച്ചിരിക്കുന്നത്. തൊട്ടുചേര്‍ന്ന് സ്ഥിതി ചെയ്യുന്ന മുനിസിപ്പാലിറ്റിയുടെ തന്നെ മറ്റൊരു കെട്ടിടത്തിലെ സെപ്റ്റിക് ടാങ്ക് നിറഞ്ഞു കവിഞ്ഞു പുറത്തേക്കു ഒഴുകാന്‍ തുടങ്ങി. ഈ മാലിന്യങ്ങള്‍ ഇരുനൂറു മീറ്റര്‍ മാത്രം അകലെയുള്ള പുഴയിലേക്കാണ് ഒഴുക്കുന്നത്. ആറ് നിലയുള്ള കെട്ടിടത്തിന് വീടുകളില്‍ ഉപയോഗിക്കുന്ന ചെറിയ ടാങ്കാണ് ഉപയോഗിച്ചിരിക്കുന്നത്.
ഇത് സംബന്ധിച്ച് നിരവധി പരാതികള്‍ നല്‍കിയെങ്കിലും ഒരു നടപടിയുമെടുക്കാതെ കൈ മലര്‍ത്തുകയാണ് അധികാരികള്‍. ആര്‍.ഡി.ഒ സ്ഥലം സന്ദര്‍ശിക്കുമെന്ന് പറഞ്ഞിരുന്നെങ്കിലും വിവാദങ്ങളില്‍ പെടാതെ സ്ഥലം സന്ദര്‍ശത്തില്‍ നിന്നും മാറിനില്‍ക്കുകയാണെന്ന് നാട്ടുകാര്‍ പറയുന്നു.