ബംഗളൂരു: ജെ.ഡി.എസുമായുള്ള അഭിപ്രായ ഭിന്നതകള്‍ കര്‍ണാടകയില്‍ പ്രതിഫലിക്കില്ലെന്ന് കോണ്‍ഗ്രസ് നേതാവ് ഡി.കെ ശശികുമാര്‍. ബി.ജെ.പിക്കെതിരെ ജെ.ഡി.എസുമായി സഖ്യം ചേര്‍ന്നതോടെ തങ്ങള്‍ക്കിടയിലെ അഭിപ്രായ ഭിന്നതയുടെ കയ്പുനീര്‍ ഇറക്കിക്കളഞ്ഞെന്ന് അദ്ദേഹം വ്യക്തമാക്കി.

'വ്യക്തിപരമായി ജെ.ഡി.എസിനെ ഏറെ എതിര്‍ത്തിരുന്നയാളാണ് ഞാന്‍. എന്നാല്‍ രാജ്യത്തിന്റെ ഭാവിക്കായി അവരുമായി ഒന്നിക്കണമെന്നു രാഹുല്‍ ഗാന്ധി പറഞ്ഞപ്പോള്‍ അതെല്ലാം മറന്നു. വ്യക്തിപരമായ ഇഷ്ടങ്ങള്‍ക്കല്ല പ്രസക്തി. രാജ്യത്തിന്റെ താല്‍പര്യത്തിനാണ്'- ശിവകുമാര്‍ പറഞ്ഞു. രാഷ്ട്രീയമെന്നു പറയുന്നത് സാധ്യതകളുടെ കളിയാണ്. അതിനാല്‍ നാം നമ്മുടെ വ്യക്തി താല്‍പര്യങ്ങള്‍ മാറ്റി വെക്കണം- അദ്ദേഹം ചൂണ്ടിക്കാട്ടി.

കര്‍ണാടകയിലെ ഭാവി വെല്ലുവിളികള്‍ നിറഞ്ഞതാവുമെന്നും എന്നാല്‍ അതെല്ലാം ഇരു പാര്‍ട്ടികളും ഒന്നിച്ചു നേരിടുമെന്നും അദ്ദേഹം വ്യക്തമാക്കി. 2019 ലോക്‌സഭ തെരഞ്ഞെടുപ്പ് കൂടി ലക്ഷ്യമിട്ടുള്ളതായിരിക്കും ഇനിയുള്ള നീക്കങ്ങളെന്നും അദ്ദേഹം കൂട്ടിച്ചേര്‍ത്തു. നിരവധി പ്രതിപക്ഷ കക്ഷികള്‍ പിന്തുണയുമായി മുന്നോട്ടു വന്നിട്ടുണ്ടെന്ന് ശിവകുമാര്‍ അവകാശപ്പെട്ടു. ലോക്‌സഭാ തെരഞ്ഞെടുപ്പ് മുന്നില്‍ കണ്ടാണിതെന്നും അദ്ദേഹം പറഞ്ഞു.

ബുധനാഴ്ചത്തെ സത്യപ്രത്ജ്ഞയും അതു കഴിഞ്ഞുള്ള വിശ്വാസ വോട്ടെടുപ്പും കഴിയുന്നതു വരെ എം.എല്‍.എമാര്‍ റിസോര്‍ട്ടുകളില്‍ തന്നെ തുടരും.