റിയാദ്: യമനില്‍ വിമത വിഭാഗമായ ഹൂതികളുടെ റോക്കറ്റ് വിക്ഷേപണ കേന്ദ്രം സഖ്യ സേന തകര്‍ത്തു.

സഅദാ, സന്‍ആ എന്നിവിടങ്ങളിലാണ് ഞായറാഴ്ച പ്രധാന റോക്കറ്റ് വിക്ഷേപണ കേന്ദ്രം ലക്ഷ്യമാക്കി കനത്ത വ്യോമാക്രമണം നടത്തിയത്.

ആക്രമണത്തില്‍ റോക്കറ്റ് സ്‌പെഷ്യലിസ്റ്റുകള്‍ക്ക് പരിക്കേല്‍ക്കുകയും ചെയ്തതായി സഖ്യ സേന അറിയിച്ചു.

ദക്ഷിണ ബഖം റീജിയനില്‍ പെട്ട ഇവിടെ നിന്നാണ് സഊദിക്ക് നേരെ റോക്കറ്റാക്രമണം ഉണ്ടാകുന്നതെന്ന് കണ്ടെത്തിയിരുന്നു. ഇതിനു പുറമെ മറ്റൊരു കേന്ദ്രമായ അല്‍ ഘോഷ് സൈനിക ബേസിന് സമീപത്തെ റോക്കറ്റ് വിക്ഷേപണ കേന്ദ്രത്തിനു നേരെയും സഖ്യ സേന ആക്രമണം നടത്തി.

കൂടാതെ ഹൂതികളുടെ വിവിധ കേന്ദ്രങ്ങളിലും ശക്തമായ ബോംബാക്രമണമാണ് സഊദി നേതൃത്വത്തിലുള്ള സഖ്യ സേന ഞായറാഴ്ച നടത്തിയത്.

മആരിബ് പ്രവിശ്യയിലെ സര്‍വയില്‍ നടത്തിയ ആക്രമണത്തില്‍ എട്ട് ഹൂതി സൈനികര്‍ കൊല്ലപ്പെടുകയും നിരവധിപേര്‍ക്ക് പരുക്കേല്‍ക്കുകയും ചെയ്തു.