പാവറട്ടി: തീരദേശമേഖലയിലെ തണുപ്പ് തേടി ചൈനയില്‍ നിന്നുള്ള വിരുന്നുകാരെത്തി. കായലോരത്തെ കണ്ടല്‍കാടുകളിലാണ് മൈനയുടെ വര്‍ഗത്തില്‍പ്പെടുന്ന റോസി സ്റ്റാര്‍ളിങ് എന്ന പേരിലറിയപ്പെടുന്ന ചൈനയില്‍ നിന്നുള്ള ദേശാടനക്കിളികളെത്തിയത്. കടുത്ത വേനലില്‍ കായലോരത്തെ കണ്ടല്‍കാടുകളിലെ തണുപ്പ് തേടിയാണ് ഇവ എത്തിയത്.
മാര്‍ച്ച് ആദ്യ വാരത്തില്‍ എത്തുന്ന ഈ ദേശാടനക്കിളിക്കൂട്ടം ജൂണ്‍ മാസത്തോടെ അടുത്ത ആവാസകേന്ദ്രം തേടി യാത്രയാകും.  
കടല്‍ തീരങ്ങളില്‍ മത്സ്യങ്ങള്‍ ഉണക്കുമ്പോള്‍ ഉണ്ടാകുന്ന പുഴുക്കളെയും നെല്‍പാടങ്ങളിലും തെങ്ങിലും കണ്ടുവരുന്ന കീടങ്ങളെയുമാണ് ഇവ ആഹാരമാക്കുന്നത്.
കര്‍ഷകര്‍ക്ക് അനുഗ്രഹമായ റോസി സ്റ്റാര്‍ളിങ്  പക്ഷിക്ക് ഒരു കൂട്ടം കിളികളുടെ ശബ്ദം ഉണ്ടാക്കാനുള്ള കഴിവുണ്ടെന്ന് പക്ഷി നിരീക്ഷകനും കണ്ടല്‍ നഴ്‌സറി ഉടമയുമായ ഉസ്മാന്‍ കൂരിക്കാട് പറഞ്ഞു.