കാസര്‍കോട്: ജില്ലാ ക്ഷീരസംഗമവും റീജ്യണല്‍ ഡയറി ലബോറട്ടറിയുടെ ഉദ്ഘാടനവും കുമ്പള നായ്ക്കാപ്പില്‍ നടക്കുമെന്നു ബന്ധപ്പെട്ടവര്‍ വാര്‍ത്താസമ്മേളനത്തില്‍ അറിയിച്ചു. 24നു രാവിലെ എട്ടിനു സംഘാടക സമിതി ചെയര്‍മാന്‍ എച്ച് ശിവരാം ഭട്ട് പതാക ഉയര്‍ത്തും. ക്ഷീര വികസന സെമിനാറില്‍ ഡോ. പി നാഗരാജ്, കെ വിജയന്‍ എന്നിവര്‍ ക്ലാസെടുക്കും.
രാവിലെ 10നു റീജ്യണല്‍ ഡയറി ലാബോറട്ടറിയുടെ ഉദ്ഘാടനം മൃഗസംരക്ഷണ മന്ത്രി കെ രാജു നിര്‍വഹിക്കും. ജില്ലാ ക്ഷീര സംഗമം ഉദ്ഘാടനം റവന്യൂ മന്ത്രി ഇ ചന്ദ്രശേഖരന്‍ നിര്‍വഹിക്കും. ക്ഷീര വികസന വകുപ്പ് ഡയരക്ടര്‍ ജോര്‍ജ് കുട്ടി ജേക്കബ്  റിപ്പോര്‍ട്ട് അവതരിപ്പിക്കും. പി.ബി അബ്ദുല്‍ റസാഖ് എം.എല്‍.എ അധ്യക്ഷനാവും. പി.കരുണാകരന്‍ എം.പി, എം.എല്‍.എമാരായ എന്‍.എ നെല്ലിക്കുന്ന്, കെ കുഞ്ഞിരാമന്‍, എം രാജഗോപാലന്‍, ജില്ലാ പഞ്ചായത്ത് പ്രസിഡന്റ് ഏ.ജി.സി ബഷീര്‍, ക്ഷീര വികസന വകുപ്പ് സെക്രട്ടറി അനില്‍ സേവ്യര്‍, മില്‍മ ചെയര്‍മാന്‍ പി.ടി ഗോപാലകുറുപ്പ്, കലക്ടര്‍ കെ ജീവന്‍ ബാബു, കെ.എന്‍ സുരേന്ദ്രന്‍ നായര്‍, ബല്‍റാം കുമാര്‍ ഉപാധ്യായ, കെ.എന്‍ പുണ്ടരികാക്ഷ എന്നിവര്‍ കര്‍ഷകരെ ആദരിക്കും. തുടര്‍ന്ന് ക്ഷീര കര്‍ഷക പാര്‍ലമെന്റ്, ഗവ്യ ജാലകം എന്നീ പരിപാടികള്‍ നടക്കും.
25നു രാവിലെ ഒന്‍പതിനു വീട്ടിയാടി ക്ഷീരകര്‍ഷക സംഘം ഓഫിസ് പരിസരത്തു നടക്കുന്ന കന്നുകാലി പ്രദര്‍ശനം ജില്ലാ പഞ്ചായത്ത് വൈസ് പ്രസിഡന്റ് ശാന്തമ്മാ ഫിലിപ്പ് ഉദ്ഘാടനം ചെയ്യും. വൈകുന്നേരം മൂന്നിനു വീട്ടിയാടി ക്ഷീര കര്‍ഷക സംഘം ഓഫിസ് കെട്ടിടം റവന്യൂ മന്ത്രി ഇ ചന്ദ്രശേഖരന്‍ ഉദ്ഘാടനം ചെയ്യും. കെ കുഞ്ഞിരാമന്‍ എം.എല്‍.എ അധ്യക്ഷനാകും. വാര്‍ത്താ സമ്മേളനത്തില്‍ സംഘാടക സമിതി ചെയര്‍മാന്‍ എച്ച്  ശിവരാം ഭട്ട്, ക്ഷീര വികസന വകുപ്പ് ഡെപ്യൂട്ടി ഡയരക്ടര്‍ ജോഷി ജോസഫ്, കാസര്‍കോട് ക്ഷീര വികസന ഓഫിസര്‍ അഞ്ജു കുര്യന്‍ സംബന്ധിച്ചു.

മലബാറിലെ ആദ്യ ഡയറി ലബോറട്ടറി

കാസര്‍കോട്: ജില്ലയിലെ കുമ്പള നായ്ക്കാപ്പില്‍ തുടങ്ങുന്ന റീജ്യണല്‍ ഡയറി ലബോറട്ടി തൃശ്ശൂര്‍ മുതല്‍ കാസര്‍കോട് വരേയുള്ള ജില്ലകളിലെ ക്ഷീര കര്‍ഷകര്‍ക്കു ലബോറട്ടറി ഗുണകരമാകും. പശുക്കള്‍, പാല്‍, പശുക്കള്‍ക്കും ആടുകള്‍ക്കും നല്‍കുന്ന തീറ്റ, പുല്ല് എന്നിവയുടെ ഗുണമേന്മാ പരിശോധന ലബോറട്ടറിയില്‍ നടക്കും. മാര്‍ക്കറ്റില്‍ വില്‍പന നടത്തുന്ന പാലിനെ സംബന്ധിച്ച് ഉപഭോക്താക്കള്‍ക്കു സംശയമുണ്ടെങ്കില്‍ അതും ലബോറട്ടറിയില്‍ പരിശോധിക്കാനാകും. കേരളത്തില്‍ തിരുവനന്തപുരത്തു മാത്രമാണ് ഇപ്പോള്‍ ഡയറി ലാബോറട്ടറി ഉള്ളത്. ഏറ്റവും കൂടുതല്‍ ക്ഷീര കര്‍ഷകരുള്ള ജില്ലയെന്ന നിലയിലാണു കാസര്‍കോടിനു ലബോറട്ടറി അനുവദിച്ചത്. കര്‍ണാടകയിലെ ക്ഷീര കര്‍ഷകര്‍ക്കും ലബോറട്ടറിയുടെ ഗുണം ലഭിക്കും.
കുമ്പള പഞ്ചായത്തിലെ കോയിപ്പാടി വില്ലേജില്‍ മൂന്നു കോടി 30 ലക്ഷം രൂപ ചെലവഴിച്ചാണ് ഡയറി ലബോറട്ടറി ഒരുക്കിയിരിക്കുന്നത്. ഇതോടനുബന്ധിച്ചു ക്ഷീര കര്‍ഷകര്‍ക്കു പരിശീലനം നല്‍കുന്നതിനായി ക്ഷീര പരിശീലന കേന്ദ്രം കൂടി അനുവദിച്ചിട്ടുണ്ട്.