കേളകം: കൊട്ടിയൂര്‍ വൈശാഖ മഹോത്സവം ഇന്ന് ആരംഭിക്കും. ഉത്സവ നഗരിയില്‍ എത്തുന്ന ഭക്തര്‍ക്ക് ശുദ്ധമായ കുടിവെള്ളം ലഭ്യമാക്കുന്നതിനായി ദേവസ്വം വകയുള്ള കിണറുകള്‍ ശുചീകരിക്കുകയും ക്ഷേത്ര ദര്‍ശനത്തിനായി ക്യൂ നില്‍ക്കുന്ന ഭക്തര്‍ക്ക് തിളപ്പിച്ചാറിയ വെള്ളം ലഭ്യമാക്കുന്നതിനുള്ള സൗകര്യവും ഏര്‍പ്പെടുത്തിയിട്ടുണ്ട്. ആരോഗ്യ വകുപ്പിന് പുറമെ 35 തൊഴിലാളികളെ ശുചീകരണത്തിനായി ദേവസ്വം നിയോഗിച്ചിട്ടുണ്ട്. ഉത്സവനഗരിയിലുള്ള മാലിന്യം സംസ്‌കരിക്കുന്നതിനായി നടപടിയും സ്വീകരിച്ചു. ഭക്തര്‍ക്ക് പ്രാഥമികകര്‍മം നിര്‍വഹിക്കുന്നതിനായി വിപുലമായ ശുചിമുറികള്‍ ഒരുക്കിയിട്ടുണ്ട്. തിരക്ക് നിയന്ത്രിക്കുന്നതിനായി 300ഓളം വളണ്ടിയര്‍മാരെയും പരിശീലനം സിദ്ധിച്ച 20ഓളം വിമുക്ത ഭടന്‍മാരുടെയും സേവനം ഉറപ്പ് വരുത്തി. പൊലിസ് ഉദ്യോഗസ്ഥരുടെ സേവനം ലഭ്യമാക്കാന്‍ ജില്ലാ ഭരണകൂടം നടപടികള്‍ സ്വീകരിച്ചിട്ടുണ്ടെന്നും ദേവസ്വം ഭാരവാഹികള്‍ അറിയിച്ചു. ഉത്സവ നഗരിയില്‍ ട്രാഫിക് നിരോധനം ഏര്‍പ്പെടുത്തിയിട്ടുണ്ടെന്നും ഭക്തര്‍ക്ക് താമസസൗകര്യങ്ങള്‍ ഏര്‍പ്പെടുത്തുന്നതിനായി അഞ്ച് കെട്ടിടങ്ങള്‍ സജ്ജീകരിച്ചിട്ടുണ്ടെന്നും ഉത്സവനഗരി പൂര്‍ണമായും സി.സി ടി.വി നിരീക്ഷണത്തിലായിരുക്കുമെന്നും ദേവസ്വം ചെയര്‍മാന്‍ തിട്ടയില്‍ ബാലന്‍ നായര്‍, എക്‌സിക്യൂട്ടീവ് ഓഫിസര്‍ ഒ.വി രാജന്‍, പോണിച്ചേരി രാമചന്ദ്രന്‍ എന്നിവര്‍ വാര്‍ത്താസമ്മേളനത്തില്‍ പറഞ്ഞു.