സുല്‍ത്താന്‍ ബത്തേരി: സ്‌കൂട്ടറില്‍ യാത്രചെയ്യുകയായിരുന്ന വിദ്യാര്‍ഥിനിയെ കാറിലെത്തി ശല്യം ചെയ്ത മൂന്ന് യുവാക്കളെ സുല്‍ത്താന്‍ ബത്തേരി പൊലിസ് അറസ്റ്റ് ചെയ്തു.
കോഴിക്കോട് സ്വദേശികളായ എലത്തൂര്‍ വടക്കേക്കാട്ട് ആദര്‍ശ് (20), ഫറൂഖ് നക്ഷത്ര നിവാസില്‍ ജിതിന്‍ രാജ് (23), എലത്തൂര്‍ വടക്കേക്കാട്ട് സുജിത്ത് (28) എന്നിവരാണ് അറസ്റ്റിലായത്. തിങ്കള്‍ വൈകിട്ട് 5.30ഓടൊണ് സംഭവം. സുല്‍ത്താന്‍ ബത്തേരി കോപ്പറേറ്റീവ് കോളജിലെ വിദ്യാര്‍ഥിനി ടൗണില്‍ നിന്നും വീട്ടിലേക്ക് സാധനങ്ങള്‍വാങ്ങി സ്‌കൂട്ടറില്‍ പോകുന്നതിനിടെ മദ്യലഹരിയില്‍ കാറിലെത്തിയ പ്രതികള്‍ ശല്യം ചെയ്യുകയായിരുന്നു.
ചുങ്കം മുതല്‍ മൈസൂര്‍ റോഡുവരെ കാറില്‍ പിന്തുടര്‍ന്ന യുവാക്കള്‍ പെണ്‍കുട്ടിക്ക് നേരെ മദ്യക്കുപ്പി നീട്ടുകയും അസഭ്യം പറയുകയും അശ്ലീലം കാട്ടിയെന്നുമാണ് പരാതി. സംഭവത്തിന് ശേഷം സുല്‍ത്താന്‍ ബത്തേരി പൊലിസില്‍ പെണ്‍കുട്ടി പരാതിപ്പെടുകയായിരുന്നു. മൈസൂരു ഭാഗത്തേക്ക് പോയ കാര്‍, പെണ്‍കുട്ടി നല്‍കിയ വിവരത്തിന്റെ അടിസ്ഥാനത്തില്‍ മുത്തങ്ങ പൊലിസ് എയ്ഡ് പോസ്റ്റില്‍ തടഞ്ഞുനിര്‍ത്തി പിടികൂടുകയായിരുന്നു.