പാലക്കാട്: നെല്ലറയുടെയും, കരിമ്പനയുടെയും നാട്ടില്‍ ഒട്ടേറെ സമര പോരാട്ടങ്ങള്‍ക്ക് സാക്ഷ്യം വഹിച്ച പാലക്കാടന്‍ തെരുവുകളിലൂടെ സൈക്കിള്‍ ചവിട്ടി ഇറോം ശര്‍മിള എത്തി. നഗരത്തിലെ തിരക്കേറിയ കോര്‍ട്ട് റോഡിലൂടെ സൈക്കിളില്‍  കോട്ടമൈതാനം വരെ  ഡി.വൈ.എഫ്.ഐ നേതാക്കളോടോപ്പാണ് ഇറോം സഞ്ചരിച്ചത്. രക്തസാക്ഷികളായ ഭഗത്‌സിങ്, രാജഗുരു, സുഖ്‌ദേവ് എന്നിവരുടെ  സ്മരണകള്‍ക്കായി നടത്തിയ റാലിയില്‍ പങ്കെടുക്കാനാണ് അവര്‍ എത്തിയത്.
റാലി ഇറോം ശര്‍മിള ഉദ്ഘാടനം ചെയ്തു. ചടങ്ങില്‍ ചിത്രകാരന്‍ ബൈജുദേവ് ഇറോം ശര്‍മിളയുടെ ചിത്രം വരച്ചു.
കൈയില്ലാത്ത പ്രണവ് കാലുകൊണ്ട് വരച്ച ഇറോം ശര്‍മിളയുടെ ചിത്രം പ്രണവ് തന്നെ അവര്‍ക്ക് സമ്മാനിച്ചു. പി.കെ പോക്കര്‍ ഭഗത്‌സിങ് അനുസ്മരണ പ്രഭാഷണം നടത്തി. ജില്ലാ പ്രസിഡന്റ് ടി.എം. ശശി അധ്യക്ഷനായി.
കെ.ഡി. പ്രസേനന്‍ എം.എല്‍.എ, നിരൂപകന്‍ ജി.പി. രാമചന്ദ്രന്‍, ഡി.വൈ.എഫ്.ഐ കേന്ദ്രകമ്മിറ്റിയംഗം നിതിന്‍ കണിച്ചേരി, കെ. സുലോചന സംസാരിച്ചു. ജില്ലാ സെക്രട്ടറി കെ. പ്രേംകുമാര്‍ സ്വാഗതം പറഞ്ഞു. പി.കെ. പോക്കര്‍ എഡിറ്റ് ചെയ്ത പുസ്തകം ചടങ്ങില്‍ ഇറോം ശര്‍മിള പ്രകാശനം ചെയ്തു.