കൊച്ചി: ചെങ്ങന്നൂര്‍ ഉപതെരഞ്ഞെടുപ്പില്‍ കേരള കോണ്‍ഗ്രസ് (എം) ന്റെ പിന്തുണ യു.ഡി.എഫിന് പ്രയോജനം ചെയ്യുമെന്നു കെ. വി. തോമസ് എം.പി. യു.ഡി.എഫ് നേതൃത്വം ഒരിക്കലും മാണിയെ തള്ളി പറഞ്ഞിട്ടില്ല. കെ.എം. മാണിയുടെ പിന്തുണ കൂടി ലഭിക്കുന്നതോടെ ഐക്യ ജനാധിപത്യ മുന്നണി കൂടുതല്‍ ശക്തിപെട്ടുവെന്ന സന്ദേശം ലഭിക്കും. ഇതു യു.ഡി.എഫിനു വളരെയധികം ഗുണം ചെയ്യുമെന്നു അദ്ദേഹം കൂട്ടിച്ചേര്‍ത്തു.മൂന്നു മാസം മുമ്പു വരെ ചെങ്ങന്നൂരിലെ ജനവികാരം കേന്ദ്ര സര്‍ക്കാരിന് എതിരായിരുന്നു.എന്നാല്‍ ഇപ്പോള്‍ സംസ്ഥാനസര്‍ക്കാരിനും എതിരാണ് ചെങ്ങന്നൂരിലെ ജനത.
കേരളത്തിലെ നിയമസംവിധാനത്തിന്റെ തകര്‍ച്ച സംസ്ഥാന സര്‍ക്കാരിനെതിരെ പ്രതിഷേധം രൂപപ്പെടാന്‍ ഇടയാക്കി. റേഷന്‍ വിതരണം ചെയ്യാന്‍ പോലും സര്‍ക്കാരിന് കഴിയുന്നില്ല. യു.ഡി.എഫിന്റെ സ്ഥാനാര്‍ഥി എല്ലാവര്‍ക്കും സ്വീകാര്യനാണെന്നും അദ്ദേഹം പറഞ്ഞു.കേരളത്തില്‍ കോണ്‍ഗ്രസും ഇടതു പക്ഷവും ഒരേ വേദിയില്‍ വരുന്നത് അപ്രായോഗികമാണ്. പക്ഷേ കേരളത്തിനു പുറത്തു ബി.ജെ.പിയെ നേരിടുന്നതിനു കോണ്‍ഗ്രസും ഇടതുപക്ഷ പാര്‍ട്ടികളും സോഷ്യലിസ്റ്റ് പാര്‍ട്ടികളും ഒന്നിക്കണം. കര്‍ണാടകയില്‍ കണ്ടത് അതാണെന്നും അദ്ദേഹം കൊച്ചിയില്‍ മാധ്യമപ്രവര്‍ത്തകരോട് പറഞ്ഞു.