തെഹ്റാന്‍: കാസ്പിയന്‍ കടലില്‍ ചരക്കുകപ്പലിനു നേരെയുണ്ടായ ആക്രമണത്തില്‍  ഉക്രൈന് ഇറാന്റെ മുന്നറിയിപ്പ്. ആക്രമണത്തിന് കനത്ത തിരിച്ചടി നല്‍കുമെന്ന് ഇറാന്‍ വിദേശകാര്യമന്ത്രി അബ്ബാസ് അരഗ്ചി മുന്നറിയിപ്പ് നല്‍കി. യൂറോപ്പിനെ യുദ്ധത്തിലേക്ക് വലിച്ചിഴക്കാന്‍ ഇസ്‌റാഈലിന്റെ നിര്‍ദ്ദേശപ്രകാരമാണ് ഉക്രൈന്‍ പ്രസിഡന്റ് വൊളോഡിമിര്‍ സെലെന്‍സ്‌കി ആക്രമണം നടത്തിയതെന്നും അദ്ദേഹം ചൂണ്ടിക്കാട്ടി. യു.എന്‍ ചാര്‍ട്ടറിന്റെ നഗ്‌നമായ ലംഘനമാണിതെന്നും അദ്ദേഹംകൂട്ടിച്ചേര്‍ത്തു. 

യൂറോപ്യന്‍ യൂണിയന്‍ വിദേശനയ മേധാവി കജ കല്ലാസ്, റഷ്യന്‍ വിദേശകാര്യ മന്ത്രി സെര്‍ജി ലാവ്‌റോവ് എന്നിവരുമായുള്ള വെവ്വേറെ ഫോണ്‍ സംഭാഷണങ്ങളില്‍ അദ്ദേഹം ഈ സംഭവത്തെക്കുറിച്ച് ചര്‍ച്ച ചെയ്തു. കീവിന്റെ ആക്രമണത്തിന് മറുപടി നല്‍കാതെ മുന്നോട്ടുപോകാനാകില്ലെന്ന് ഇരുപക്ഷത്തോടും അറിയിച്ചു.  

ALSO READ: ആക്രമണ- പ്രത്യാക്രമണങ്ങളില്ലാത്ത രണ്ടാം നാള്‍; ഇറാനുമായി ചര്‍ച്ചക്കൊരുങ്ങുന്നതായി യു.എസ്, സമാധാന പ്രതീക്ഷയില്‍ പശ്ചിമേഷ്യ

ഇറാന്‍ ചരക്കുകപ്പലിനു നേരെ ഉക്രൈന്‍ ആക്രമണം; ഒരു മരണം
ആക്രമണത്തില്‍ ഒരു നാവികന്‍ കൊല്ലപ്പെടുകയും ഒരാള്‍ക്ക് പരുക്കേല്‍ക്കുകയും ചെയ്തിട്ടുണ്ട്. സംഭവത്തെ തുടര്‍ന്ന് ഉക്രൈന്‍ നയതന്ത്ര പ്രതിനിധിയെ വിളിച്ചുവരുത്തി ഇറാന്‍ പ്രതിഷേധമറിയിച്ചു. യു.എസ്-ഇറാന്‍ സംഘര്‍ഷത്തിന് അയവുവന്ന സാഹചര്യത്തിലാണ് ഉക്രൈന്‍ ഇറാന്‍ യുദ്ധത്തില്‍ ഇടപെടുന്നത്. അതേസമയം, ഇറാന് കൈമാറാനുള്ള ആയുധങ്ങളുമായി പോയ റഷ്യന്‍ കപ്പലിനെയാണ് ലക്ഷ്യമിട്ടിരുന്നതെന്ന് ഉക്രൈന്‍ പ്രസിഡന്റ് വൊലോദിമിര്‍ സെലന്‍സ്‌കി പറഞ്ഞു. യു.എസിനെതിരേ ഇറാന്‍ സൈന്യത്തെ റഷ്യ സഹായിക്കുകയാണെന്നും സെലന്‍സ്‌കി  കുറ്റപ്പെടുത്തി. 

ഹോര്‍മുസിനു ചുറ്റും യു.എസ് ഉപരോധം നേരിടുന്ന ഇറാന് ഇത്രകാലവും സുരക്ഷിത പാതയായിരുന്ന കാസ്പിയന്‍ കടലിലും ആക്രമണം നേരിടുന്നത് വലിയ ആശങ്കയാണ് ഉയര്‍ത്തുന്നത്. ഇറാനുമേല്‍ സമ്മര്‍ദം ചെലുത്തുന്നതിന് യു.എസിനു വേണ്ടി ഉക്രൈന്‍ ഇടപെടുകയാണെന്നും സംശയമുണ്ട്. അതേസമയം, ഇറാന്റെ കൈവശം കീവിലെത്തുന്ന മിസൈലുകളുണ്ടെന്ന് വിദഗ്ധര്‍ ചൂണ്ടിക്കാട്ടുന്നു.

iran has warned ukraine of a strong response after a cargo ship attack in the caspian sea, calling it a violation of international law and escalating regional and geopolitical tensions.