പയ്യന്നൂര്‍: സി.പി.എം പ്രവര്‍ത്തകനെ പട്ടാപകല്‍ വെട്ടി കൊല്ലാന്‍ ശ്രമിച്ചതിനു പിന്നാലെ പയ്യന്നൂരില്‍ അക്രമം പടരുന്നു.
ഇന്നലെ രാവിലെ 9.45നാണ് മുന്‍ ആര്‍.എസ്.എസ് പ്രവര്‍ത്തകനും ഇപ്പോള്‍ സി.പി.എം പ്രവര്‍ത്തകനുമായ കുന്നരുബാങ്കിന് സമീപത്തെ ഷിനുവിനെ ഇന്നോവ കാറില്‍ എത്തിയ ഒരു സംഘം ബൈക്ക് തടഞ്ഞ് വടിവാള്‍കൊണ്ട് വെട്ടാന്‍ ശ്രമിച്ചത്. ഇതിന്റെ തുടര്‍ച്ചയായാണ് അക്രമം അരങ്ങേറിയത് .മണിക്കൂറുകള്‍ക്കുള്ളില്‍ ഉണ്ടായവ്യത്യസ്ത അക്രമസംഭവങ്ങള്‍പയ്യന്നൂര്‍ നഗരത്തെ ഭീതിയിലാക്കി
ജനങ്ങള്‍ ആശങ്കയിലാണ് .ടൗണില്‍ നിന്നും ജനങ്ങള്‍ ഒഴിഞ്ഞ് പോകാന്‍ തുടങ്ങിയിട്ടുണ്ട്. കഴിഞ്ഞ രണ്ട് വര്‍ഷങ്ങള്‍ക്കുള്ളില്‍ പയ്യന്നൂരിലെ സമാധാനന്തരീക്ഷം തകര്‍ക്കുന്ന വിധത്തിലാണ് രാഷ്ട്രീയ കൊലപാതകങ്ങളും അക്രമസംഭവങ്ങളും നടന്ന് വരുന്നത്.
പയ്യന്നൂരില്‍ രാഷ്ട്രീയ അക്രമപരമ്പരകള്‍ അരങ്ങേറാന്‍ തുടങ്ങിയത് കുന്നരുവിലെ സി.പി.എം പ്രവര്‍ത്തകനും
ഡി.വൈ.എഫ്.ഐ നേതാവുമായ പി.ധനരാജിന്റെ കൊലയ്ക്കു ശേഷമാണ്. ധനരാജിന്റെ കൊലപാതകം നടന്ന് മണിക്കൂറുകള്‍ക്കുള്ളില്‍ തന്നെ ബി.ജെ.പി പ്രവര്‍ത്തകനും പയ്യന്നൂരിലെ ഓട്ടോറിക്ഷാ തൊഴിലാളിയുമായിരുന്ന സി.കെ രാമചന്ദ്രനും കൊലക്കത്തിക്ക് ഇരയായി.
ഒരു വര്‍ഷത്തിന് ശേഷം ധനരാജ് വധക്കേസിലെ പന്ത്രണ്ടാം പ്രതിയായ ചൂരക്കാട്ട് ബിജുവിനെയും കൊലപ്പെടുത്തി.
രാഷ്ട്രീയ കൊലപാതകങ്ങളും അക്രമണ പരമ്പരകളും പയ്യന്നൂരിലുണ്ടാകുമ്പോള്‍ ഏറെ കഷ്ടപ്പെടുന്നതും പയ്യന്നൂരിലെ സാധാരണക്കാരായ ജനങ്ങളാണ്.