തിരുവനന്തപുരം: ഭിന്നശേഷിക്കാര്‍ക്ക് സമഗ്രമായ ആരോഗ്യ ഇന്‍ഷുറന്‍സ് പദ്ധതി നടപ്പിലാക്കുമെന്ന് മന്ത്രി കെ.കെ ശൈലജ. ഭിന്നശേഷിക്കാര്‍ക്ക് ഇന്‍ഷുറന്‍സ് പരിരക്ഷയ്ക്കായി പ്രഖ്യാപിച്ച സ്വാവലംബന്‍ ഇന്‍ഷുറന്‍സ് പദ്ധതി കേന്ദ്ര സര്‍ക്കാര്‍ ഉപേക്ഷിച്ചതിനെ തുടര്‍ന്നാണ് സംസ്ഥാന സര്‍ക്കാര്‍ പുതിയ ആരോഗ്യ ഇന്‍ഷുറന്‍സ് പദ്ധതി ആവിഷ്‌കരിക്കുന്നത്. സംസ്ഥാന വിഹിതമായ 3.57 കോടി രൂപ ഈ സര്‍ക്കാര്‍ അടച്ച് ഒരു വര്‍ഷമായിട്ടും കേന്ദ്രം ഒരു നടപടിയും സ്വീകരിക്കാത്തതിനെ തുടര്‍ന്നാണിതെന്നും മന്ത്രി പറഞ്ഞു.
സര്‍ക്കാരിന്റെ രണ്ടാം വാര്‍ഷികാഘോഷങ്ങളുടെ ഭാഗമായി കേരള സംസ്ഥാന വികലാംഗക്ഷേമ കോര്‍പറേഷന്‍ കാഴ്ച പരിമിതിയുള്ള 100 വിദ്യാര്‍ത്ഥികള്‍ക്ക് ലാപ്‌ടോപ്പ് വിതരണം ചെയ്യുന്ന 'കാഴ്ച-2018'ന്റെ ഉദ്ഘാടനം നിര്‍വഹിച്ചു സംസാരിക്കുകയായിരുന്നു മന്ത്രി.
മന്ത്രി കടകംപള്ളി സുരേന്ദ്രന്‍ അധ്യക്ഷനായി. ജില്ലാപഞ്ചായത്ത് പ്രസിഡന്റ് വി.കെ മധു മുഖ്യാതിഥിയായി.സാമൂഹ്യനീതി വകുപ്പ് സ്‌പെഷല്‍ സെക്രട്ടറി ബിജു പ്രഭാകര്‍ മുഖ്യ പ്രഭാഷണം നടത്തി. വികലാംഗ ക്ഷേമ കോര്‍പറേഷന്‍ ചെയര്‍മാന്‍ അഡ്വ. പരശുവയ്ക്കല്‍ മോഹനന്‍, മാനേജിങ് ഡയരക്ടര്‍ മൊയ്തീന്‍കുട്ടി, കെ.എസ്.എസ്.എം എക്‌സി. ഡയരക്ടര്‍ ഡോ. മുഹമ്മദ് അഷീല്‍, കൗണ്‍സിലര്‍ ഐ.പി ബിനു, കെ.ജി സജന്‍, ഒ. വിജയന്‍, ഗിരീഷ് കീര്‍ത്തി, പങ്കെടുത്തു. ലാപ്‌ടോപ്പ് പരിശീലന ക്ലാസും സംഘടിപ്പിച്ചു.
കാഴ്ചയുടെ പരിമിതികളെ ശബ്ദ സംവിധാനത്തിലൂടെ മറികടക്കാനും അറിവിന്റെ പുതിയ ലോകത്തേയ്ക്ക് അവരെ നയിക്കാനുമുളള സാങ്കേതിക സംവിധാനമാണ് ലാപ്‌ടോപ്പില്‍ ഒരുക്കിയിരിക്കുന്നത്. ശബ്ദ സംവിധാനത്തിനു പുറമേ സ്‌കാനിങ് ഓഡിയോ എഡിറ്റിങ് സംവിധാനങ്ങളും ലാപ്പ്‌ടോപ്പിലുണ്ട്.
മൂന്ന് വര്‍ഷത്തെ ബാറ്ററിയുടെ വാറണ്ടിയടക്കം അഞ്ചു വര്‍ഷത്തെ വാറണ്ടിയോട് കൂടിയാണ് ലാപ്പ്‌ടോപ്പ് നല്‍കുന്നത്. കൂടാതെ മോഷണമടക്കമുളള വിഷയങ്ങളെ മറികടക്കുന്നതിന് ഇന്‍ഷുറന്‍സ് കവറേജും നല്‍കുന്നുണ്ട്. 40 ലക്ഷം രൂപയാണ് ഇതിനായി സര്‍ക്കാര്‍ അനുവദിച്ചത്. സ്റ്റോര്‍ പര്‍ച്ചേസ് മാനുവല്‍ നിര്‍ദ്ദേശിച്ച പ്രകാരം കേരള ഐ.ടി മിഷനും, കേരള ഫെഡറേഷന്‍ ഓഫ് ബ്ലൈന്‍ഡും തയ്യാറാക്കി നല്‍കിയ സ്‌പെസിഫിക്കേഷന്‍ അനുസരിച്ചാണ് ലാപ്പ്‌ടോപ്പുകള്‍ സമാഹരിച്ചത്.